Азаматтық қорғау саласын материалдық-техникалық тұрғыдан нығайту мақсатында Абай облысы Төтенше жағдайлар департаментінің автопаркі 5 заманауи өрт сөндіру техникасымен толықты, - деп хабарлайды abaidan.kz ақпараттық агенттігі Абай облысы әкімінің баспасөз қызметіне сілтеме жасап.
3 өтімділігі жоғары КАМАЗ базасындағы АЦ-5-40 өрт сөндіру автоцистернасы 2 өтімділігі жоғары КАМАЗ базасындағы сорғы-жең өрт сөндіру автомобилі (СЖА). Өрт сөндіру автоцистернасы өрт сөндіру сорғысымен, арнайы сыйымдылықтармен жабдықталған және жеке құрамды, техника мен өрт сөндіру заттарын өрт орнына жеткізуге арналған.
Сорғы-жең өрт сөндіру автомобилі (СЖА) – ірі өрттерді сөндіру кезінде аса қажет техника. Ол жеке құрамды және құралдарды өрт орнына жеткізіп қана қоймай, 2 шақырым қашықтыққа дейін су беруді қамтамасыз етіп, резервтік су қорын құруға мүмкіндік береді.
