Ертістің сол жағалауындағы қоғамдық кеңістікте Республика күніне арналған салтанатты жиын өтті. Мерекелік шараға Абай облысы әкімінің орынбасары Мейірлан Раханов, мемлекеттік органдардың өкілдері, қоғам белсенділері, жастар және қоғамдық пікір көшбасшылары қатысты.
Іс-шара барысында еліміздің тәуелсіздігі мен бірлігін айшықтайтын Мемлекеттік Ту салтанатты түрде көтерілу рәсімі өтті. Бұл — Қазақстанның бай тарихын, оның жетістіктері мен жарқын болашағын еске салатын маңызды әрі рухани мәні зор сәт болды.
Көлемі 3х6 метрлік ту Семей қаласының ең биік нүктесіне — биіктігі 90 метр болатын аспалы көпірге орнатылды.
Бұл шара облыс тұрғындарының береке-бірлігін, ортақ күш-жігер мен елжандылықты паш етіп, азаматтардың өз Отанын дамытуға бірге үлес қосуға дайын екенін көрсететін тамаша үлгіге айналды.
Семейліктер үшін бұл күн елдік мақтаныш пен бірліктің символына айналды. Республика күні – әр қазақстандықтың жүрегіндегі мақтаныш пен елге деген сүйіспеншіліктің мерекесі.
Семей аспанында желбіреген көк байрақ – бейбіт елдің, біртұтас ұлттың нышаны болып қала бермек.
