23 тамыздағы Құрылтай сайлауында тіркелген жерінде болмайтын азаматтар кез келген учаскеде дауыс бере алады, деп хабарлайды abaidan.kz Астана әкімдігінің ресми сайтына сілтеме жасап.
Әкімдіктің мәліметінше, есептен шығару куәлігі арқылы дауыс беру — сайлау күні тұрақты тіркелген жерінен тыс жерде болатын азаматтарға Қазақстанның кез келген сайлау учаскесінде өз таңдауын жасауға мүмкіндік беретін рәсім.
— Ол үшін азамат өзі тіркелген учаскелік сайлау комиссиясына жазбаша өтініш беруі қажет. Өзімен бірге жеке куәлігі немесе төлқұжаты болуы тиіс. Сондай-ақ куәлікті сенім білдірілген өкіл арқылы да алуға болады. Бұл жағдайда нотариалды куәландыру талап етілмейді, — делінген хабарламада.
Есептен шығару куәліктері сайлауға 15 күн қалғанда беріле бастайды және дауыс беру күніне дейінгі күнгі сағат 18:00–де тоқтатылады.
Сайлау күні азамат Қазақстан аумағындағы өзі таңдаған сайлау учаскесіне барып, есептен шығару куәлігі мен жеке басын куәландыратын құжатын көрсетуі қажет. Осыдан кейін ол сайлаушылар тізіміне енгізіліп, дауыс беру бюллетені беріледі.
