Абай облысында еңбек адамының мәртебесін арттырып, кәсіби шеберлік пен ұрпақтар сабақтастығын насихаттайтын «Еңбек жолы» конкурсының өңірлік кезеңі қорытындыланды. Салтанатты шарада облыс әкімі Берік Уәли байқаудың үш номинациясы бойынша жеңімпаздарды марапаттап, олардың еңбегін ел дамуына қосылған маңызды үлес ретінде атап өтті.
Биыл Абай облысында конкурсқа өтінімдер 21 сәуір мен 1 тамыз аралығында қабылданды. Нәтижесінде өңірдің түрлі салаларында еңбек етіп жүрген азаматтардан 24 өтінім түскен. Байқау «Үздік еңбек әулеті», «Жұмыс істейтін жастардың үздік тәлімгері» және «Өндірістің үздік жас маманы» номинациялары бойынша ұйымдастырылды.
Облыс әкімі Берік Уәли өз сөзінде адал еңбектің қоғамдағы маңызын атап өтіп, кәсіби біліктілігімен және мамандығына деген жауапкершілігімен ерекшеленген азаматтарға алғысын білдірді.
«Еңбек адамының қоғамдағы мәртебесін арттыруға және еңбек өнімділігін ынталандыруға бағытталған «Еңбек жолы» конкурсының маңызы ерекше. Бүгін еңбегімен елге үлгі болып жүрген азаматтарды құрметтеп, оларды салтанатты түрде марапаттау үшін жиналып отырмыз. Әр салада мамандыққа адалдықтың шынайы үлгісін көрсетіп қана қоймай, кәсіби біліктілігімен көзге түсіп, өз ісінің қыр-сырын жетік меңгерген ерен еңбектеріңіз бар құрметке лайық. Мұның барлығы – Абай облысының дамуына қосылған нақты үлес», – деді өңір басшысы.
Теміржолды таңдаған тұтас әулет
«Үздік еңбек әулеті» номинациясында Аягөз қаласында тұратын Байғозовтар отбасы жеңімпаз атанды. Бұл әулеттің теміржол саласындағы жалпы еңбек өтілі 262 жылдан асады.
Әулеттің үлкені Қажияхмет Байғозовтың еңбек жолы да теміржол саласымен тығыз байланысты. Әкесінің кәсібін жалғастырған ол өмірінің басым бөлігін теміржол саласына арнаған. Бүгінде оның алты баласының бесеуі әке жолын қуып, осы салада еңбек етіп келеді.
Қажияхмет Байғозовтың айтуынша, мамандыққа деген адалдық пен еңбекқорлық – кейінгі ұрпаққа қалдырар басты өнегесі.
«Менің зейнетке шыққаныма 35 жыл болды. Әкем теміржолшы еді. Әке жолын жалғап, мен де өмір бойы теміржол саласында еңбек еттім. Алты баламның бесеуі менің жолымды қуып, осы саланы таңдады. Жастарға айтарым – қандай мамандықты таңдасаңдар да, еңбектерің адал болсын. Адал еңбек қашанда абыройға жеткізеді», – деді ол.
Байғозовтар әулетінің тарихы – бір мамандықтың бірнеше буын өкілдерін тоғыстырып, кәсіби дәстүрдің ұрпақтан ұрпаққа жалғасуының нақты мысалы.
Тәлімгерлік – тәжірибені ұрпаққа жеткізудің жолы
«Жұмыс істейтін жастардың үздік тәлімгері» номинациясында Курчатов қаласының тұрғыны Альмира Айдарханова жеңімпаз атанды.
Ол «ҚР Ұлттық ядролық орталығы» РМК «Радиациялық қауіпсіздік және экология институты» филиалының мониторинг және экологиялық-талдамалық зерттеулер бөлімін басқарады. Ғылыми-зерттеу саласында еңбек етіп жүрген маман 200-ге жуық ғылыми жұмыс пен жарияланымның авторы және бірлескен авторы.
Тәжірибелі маманның тәлімгерлік қызметі де нәтижелі. Оның жетекшілігімен жеті магистрант магистрлік диссертацияларын қорғап, 80-ге жуық ғылыми еңбек жариялаған.
Бұл көрсеткіштер тәлімгердің тек өз кәсіби саласындағы тәжірибесімен шектелмей, жас мамандардың қалыптасуына да елеулі үлес қосып жүргенін көрсетеді.
Жас маманның өндірістегі жолы
«Өндірістің үздік жас маманы» номинациясында Семей қаласының тұрғыны Айбол Тыныштықов жеңімпаз атанды.
Ол еңбек жолын «Семей автоқұрастыру зауытында» трактор құрастыру желісінің слесарь-жинаушысы болып бастаған. Өндірістегі тәжірибесі мен кәсіби біліктілігін шыңдай келе, 2025 жылдың ақпан айында техникалық бөлімге инженер-технолог қызметіне ауысқан.
Жас маманның еңбек жолы өндірісте тәжірибе жинақтап, кәсіби тұрғыдан өсуге мүмкіндік бар екенін көрсетеді. Оның жетістігі – өз мамандығын меңгеруге ұмтылған жастар үшін маңызды үлгі.
Еңбекпен қамту – басты бағыттардың бірі
«Еңбек жолы» конкурсының қорытындысы еңбек адамына құрмет көрсетумен қатар, өңірдегі жұмыспен қамту саясатының маңызын да айқындай түсті.
Абай облысында халықты тұрақты жұмыспен қамту және азаматтардың кәсіпкерлік бастамаларын қолдау бағытындағы жұмыстар жалғасуда. Биыл Өңірлік жұмыспен қамту картасы аясында 13 324 адамды жұмыспен қамту жоспарланған. Жыл басынан бері 14 мыңға жуық азамат жұмысқа орналастырылған.
Сонымен қатар әлеуметтік осал санаттағы 97 азаматқа жаңа бизнес-идеяларын жүзеге асыру үшін әрқайсысына 1 млн 730 мың теңгеден қайтарымсыз грант берілген. Еңбек нарығындағы сұранысқа сай 234 азамат кәсіптік оқуға жолданып, оның 145-і оқуын аяқтап, жұмысқа орналасқан.
Бұл көрсеткіштер өңірде еңбек нарығының қажеттілігіне сай мамандар даярлау, жұмыс орындарын ашу және азаматтардың кәсіпкерлік бастамаларын қолдау бағыттарына басымдық беріліп отырғанын аңғартады.
Байқау қорытындысы бойынша Абай облысының үш өңірлік жеңімпазы енді республикалық деңгейдегі іріктеу кезеңіне қатысады. Олардың қатарында талай жылын теміржол саласына арнаған еңбек әулеті, жас мамандарға бағыт-бағдар беріп жүрген тәжірибелі тәлімгер және өндірісте кәсіби жолын қалыптастырып келе жатқан жас маман бар.
Үш түрлі тағдыр, үш түрлі еңбек жолы – барлығының ортақ құндылығы бір: өз ісіне адалдық, кәсіби шеберлік және ел дамуына үлес қосуға деген ұмтылыс.
