Алакөл жағалауында инфрақұрылым жаңарып, жаңа нысандар іске қосылды
Алакөл – еліміздегі ең танымал туристік бағыттардың бірі. Соңғы жылдары бұл өңірге келушілер саны айтарлықтай артып, соған сәйкес демалыс аймағының инфрақұрылымын дамыту жұмыстары қарқын алған. Бұл туралы Мақаншы ауданы әкімі Дәурен Қойгельдин Өңірлік коммуникациялар қызметінде өткен брифингте мәлімдеді. Оның айтуынша, аталған жұмыстар облыс әкімі Берік Уәли берген тапсырмалар аясында жүзеге асырылып жатыр.
Әкімнің сөзінше, демалушылар үшін қолайлы жағдай жасау және туристік қызмет сапасын арттыру мақсатында бірқатар маңызды жобалар қолға алынған. Соның ішінде жағалауда қауіпсіздік пен қолжетімділікті арттыруға ерекше көңіл бөлінген.
Қабанбай ауылы аумағында өрт сөндіру депосы салынып, пайдалануға берілген. Сонымен қатар Алакөл жағалауында жаңа құтқару стансасы ашылып, демалушылардың қауіпсіздігін қамтамасыз ету деңгейі артқан. Бұдан бөлек, 5 шақырымдық жағалау жолына асфальт төселіп, көлік қатынасы едәуір жақсарған.
Өрт қауіпсіздігін күшейту мақсатында Қабанбай ауылдық округіне қосымша арнайы техника да берілген. Бұл төтенше жағдайлардың алдын алуға және жедел әрекет етуге мүмкіндік береді.
Экологиялық мәселелер де назардан тыс қалмаған. Ұзақ уақыт бойы өзекті болып келген тұрмыстық қалдықтарды өңдеу проблемасын шешу бағытында нақты қадамдар жасалуда. Атап айтқанда, Қабанбай ауылынан 7 шақырым қашықтықта қатты тұрмыстық қалдықтар полигонын салу жобасы әзірленіп, мемлекеттік сараптамаға жіберілген. Құрылыс жұмыстарын биыл бастау жоспарланып отыр.
Сонымен қатар сұйық қалдықтарды өңдеу үшін модульдік тазарту құрылысын орнату бойынша жобалау жұмыстары жүргізілуде. Бұл бастамалар өңірдің экологиялық жағдайын жақсартып, туристік аймақтың тартымдылығын арттыруға ықпал етпек.
Жалпы алғанда, Алакөл жағалауында жүргізіліп жатқан бұл жаңғырту жұмыстары демалушылар үшін қолайлы әрі қауіпсіз орта қалыптастыруға бағытталған. Алдағы уақытта да инфрақұрылымды дамыту жалғасып, өңірдің туристік әлеуеті одан әрі күшейе түспек.
#Абай облысы, #Алакөл, #Мақаншы ауданы, #инфрақұрылым
