Аймақ басшысы Нұрлан Ұранхаев қала нысандарын аралады
Қаланы аралау барысында Нұрлан Ұранхаев облыс орталығының жылумен қамтамасыз ету нысандарындағы құрылыс жұмыстарын, аулаларды абаттандыру барысын көрді,-деп хабарлайды abaidan.kz агенттігі өңірлік коммуникациялар қызметіне сілтеме жасап. Сонымен қатар, Галето көшесіндегі орташа жөндеу жұмыстарының аяқталуын, Лермонтов көшесіндегі «Құтқарушылар сквері» қоғамдық кеңістігін абаттандыруды тексерді. Скверді абаттандыру жұмыстарымен «СемДорТехника» ЖШС айналысуда. Ендігі жоспарда шаһардағы тарихи қиылысты абаттандыру, жағажай аумағы мен құтқарушылар аллеясын құру жұмыстары тұр. Облыс әкімі 343 және 35 кварталдардағы тұрғын үйлер аулаларының абаттандырылуын көзімен көрді. Ағымдағы 46 аула аумағын абаттандыру жоспарланған.
Шарт шеңберінде аулаларда балалар және спорт алаңдары, футбол алаңдары, тұрғындар үшін демалыс аймақтары және тұрғындардың тұрмыстық қажеттіліктері үшін аймақтар орнатылады. Сонымен қатар, Нұрлан Уранхаев ЦТП-518 және орамішілік жылу желілерін қайта жаңғырту және №1 ЖЭО-ғы су жылыту қазандығын жөндеу барысын тексерді.
«Мұндай қалаішілік жұмыс сапарлар атқарылып жатқан жұмыс сапасын бақылау үшін үнемі өткізіліп тұрады. Барлық жобалар бекітілген кестеге және белгіленген мерзімде аяқталуы керек. Жазғы маусымның аяқталатынын ескере отырып, мердігерлер жұмыс қарқынын жылдамдатуы керек. Біздегі қазіргі қолайлы ауа-райын барынша тиімді пайдалануымыз керек. Әрбір жобаның жоғары деңгейде атқарылуы қала тұрғындарына жайлы жағдай жасауға септігін тигізеді», - деді облыс әкімі.
Семейде заманауи ІТ колледжін ашу жоспарлануда. Қазіргі уақытта барлық инженерлік желілер, соның ішінде жылу, жарықтандыру, сумен жабдықтау және кәріз желілері күрделі жөндеуден өтуде. Коммуникациялар жасанды интеллектті қолдана отырып, Smart-технологиялар бойынша орнатылатын болады. Шатырдың оңтүстік жағында күн электр станциясын орнату жоспарлануда. Жөндеу жұмыстары оқу жылының басында аяқталуы керек.
