Қазақстан халқы Ассамблеясының 30 жылдығын қорытындылаған форум өтті
Бүгін Қазақстан халқы Ассамблеясының 30 жылдығына арналған «Бірлік пен келісім жолындағы 30 жыл» форумы ұйымдастырылды. Іс-шараға өңірлер онлайн қосылып, форумға Ішкі саясат басқармасының өкілдері, ҚХА мүшелері, этномәдени бірлестіктердің жетекшілері мен өкілдері, сондай-ақ жастар қатысты.
Форумның мақсаты – Ассамблеяның 30 жылдық қызметін қорытындылап, этносаралық келісім мен қоғамдық тұрақтылықты нығайту бағытында жинақталған тәжірибені талқылау болды. Іс-шара барысында ҚХА-ның негізгі бастамалары мен жобалары таныстырылды.
Абай облысының Қазақстан халқы Ассамблеясының ғылыми-сараптамалық тобының төрағасы Айрат Базенов форумда Ассамблея жұмысының ел алдындағы рөліне тоқталды.
- Біз бүгін Ассамблеяның 30-жылдығында атқарылған жұмысты қорытындыланып, халыққа ұсынылғанына куә болдық. Біздің мемлекет әр ұлттың мәдени, тілдік және діни ерекшелігіне құрметпен қарауды ең жоғары құндылық ретінде қояды. Ассамблея жанындағы бірлестіктер – еліміздегі барлық этностарға өз мәдениетін, тілін, дәстүрін сақтап, дамытуға мүмкіндік беретін маңызды алаң. Барлық ұлттың өз ерекшелігін еркін сақтай алу мүмкіндігі – Қазақстан халқы Ассамблеясының ең басты еңбегінің нәтижесі, – деді спикер.
Форум Қазақстан халқы Ассамблеясының елдегі бейбітшілік, татулық және азаматтық келісімнің маңызын тағы бір мәрте айқындады.
