«SEMEI» телеарнасына – 60 жыл: Тарихы мен жетістіктері
1 қыркүйек, 1965 жыл. Семейде тарихтағы жаңа кезең басталды: «Семей телеорталығы» өз жұмысын бастады. Бұл Қазақстандағы Алматы, Қарағанды, Өскемен, Ақтөбе сияқты телестудияларынан кейінгі бесінші телеорталық болатын. Одақ көлемінде 116-шы телеорталық ретінде ашылған Семей телеарнасы, сол кезден бастап аймақтық ақпараттық кеңістікте қызмет жасап келеді.
60 жыл ішінде «SEMEI» арнасы түрлі даму кезеңдерін, қиындықтар мен жеңістерді бастан өткерді. 1997 жылы Семей облысының тарауы және 2016 жылы телеарнаны жабу туралы қабылданған үкіметтік шешімдер арнаның болашағына қатер төндірді. Бірақ көрермендер мен жергілікті тұрғындардың қолдауымен арна қызметін жалғастыра алды. Оның үстіне, 2022 жылы Абай облысының құрылуымен бірге арна жаңа тыныс ала бастады. Қазіргі таңда «SEMEI» телеарнасы тәулігіне 14 сағаттық хабар тарату режимінде жұмыс істейді, ал көрермендерге 30-ға жуық авторлық бағдарлама ұсынылады.
Арнаның мазмұнын жаңғырту мақсатында 2022 жылы «Digital SEMEI» шығармашылық бөлімі құрылды. Бұл бөлім арнаның ақпараттық кеңістіктегі орнын нығайтуға және жаңа медиа форматтарды енгізуге бағытталған. Сонымен қатар, арна заманауи технологияларды қолдану арқылы сапалы әрі қызықты хабарлар таратуда.
«SEMEI» телеарнасының 60 жылдық мерейтойы аясында ауқымды салтанатты шара ұйымдастырылды. Бұл ерекше күнде сала ардагерлері мен БАҚ өкілдері, сондай-ақ арнаның қызметкерлері мен көрермендері жиналды. Мерейтойға орай ұйымдастырылған көрме телеарнаның өткен ғасырлардағы дамуын, арна үшін маңызды кезеңдерді және оның жарты ғасырлық тарихын көрсететін экспонаттарды қамтыды.
ҚР Сенат төрағасы Мәулен Әшімбаев пен ҚР Мәжіліс төрағасы Ерлан Қошанов құттықтау тілектерін жолдады.
Сондай-ақ, Абай облысының әкімі Берік Уәлиұлы арна ардагерлері мен қызметкерлерін және көрермендерді 60 жылдық мерейтоймен құттықтап, арнаға жаңа автокөліктің кілтін сыйға тартты.
Мерейтойға орай ардагерлер мен телеарна қызметкерлері марапатталып, олардың еңбек жолы ерекше атап өтілді.
«Qazaqstan» Ұлттық телеарнасының директоры Болат Мұрсәлім де осы ерекше күнге орай ізгі тілектерін білдірді.
Сонымен қатар, ауқымды шара барысында арна қызметкерлерінің еңбек жолына арналған сахналық қойылымдар мен әндер де ұсынылды, бұл көрермендерге ерекше әсер қалдырды.
Мерейтойлық шара барысында, арнаға деген құрмет көрсетілді. Семей телеарнасы тарихындағы маңызды оқиға – Фатима Бегенбаева атындағы кабинеттің ашылуы мен Бәтташ Сыдықов атындағы медиа аудиторияның күрделі жөндеуден кейінгі қайта ашылуы болды. Бұл шаралардың барлығы телеарна қызметінің дамуына үлкен серпін беріп, жаңа мүмкіндіктерге жол ашты.
Бұл мерейтой – тек «SEMEI» телеарнасының жетістіктерін атап өтудің ғана емес, оның болашағына деген үміттің, жаңа жоспарлардың бастамасы. Телеарна 60 жыл бойы өзінің сапалы контенті мен үздік журналистік жұмысы арқылы көрермендерінің сенімін ақтады. Алдағы уақытта да «SEMEI» телеарнасы Абай облысының ақпараттық кеңістігінде маңызды орын алатын болады.
«SEMEI» телеарнасының 60 жылдық тарихы Қазақстан телевизиясындағы үлкен жетістік пен тұрақтылықтың символы. Оның ардагерлері мен қызметкерлері, сонымен қатар көрермендері арнаның дамуына үлкен үлес қосты. Осы кезеңдерде телеарна көптеген қиындықтарды еңсеріп, көптеген жетістіктерге жетті. Ал болашақта да «SEMEI» арнасы сапалы әрі қызықты бағдарламалары арқылы елімізде және одан тыс жерлерде танымал болады деген сенімдеміз.
#Семей, #Абайская область, #Телеканал Семей
