Семейде Құтқарушылар күніне арналған баспасөз туры өтті
19 қазан күні Құтқарушылар күніне орай, Семейде баспасөз туры өтті,-деп хабарлайды abaidan.kz ақпараттық агенттігі өңірлік коммуникациялар қызметіне сілтеме жасап. "Батырлар күні: құтқарушылардың жұмыс барысы" тақырыбындағы іс-шарада БАҚ өкілдері басқаларды құтқару кезінде өз өмірлерін қатерге тігетін кәсіп иелері жұмысына куә болды.
Баспасөз туры құтқарушылар ескерткішіне гүл қою рәсімінен басталды. Жаңа қызметкерлер, яғни жас құтқарушылар ант қабылдады.
Іс-шара барысында е заманауи жабдықтарға баса назар аударылды. Жетілдірілген авариялық-құтқару құралдарының қалың қардан бастап су тасқынына дейінгі түрлі төтенше жағдайларға төтеп бере алатындығы көрсетілді.
Бастысы қиын кезде жолда қалдырмайтын жаңа техниканы көрсету болды. Қатысушылар төтенше жағдайларда жұмыс істеуге арналған Toyota Hilux көліктерінің, сондай-ақ, жол талғамайтын әмбебап техникалардың жұмысымен танысты. Құтқару қызметінің мамандары барлық мүмкіндіктерін паш етіп, машиналардың күші-қуаты мен тиімділігін көрсетті.
Абай облысының ТЖД Жедел-құтқару жасағының басшысы Александр Селинкин 20 жылдан астам өмірін құтқару қызметіне арнаған маман.
- Шынымды айтсам, мен өз таңдауыма ешқашан өкінген емеспін. Бұл менің қолымнан келетін жұмыс екенін түсіндім. Менің отбасым, жақындарым мені қолдайды. Жұмыс күрделі, қауіпті, бірақ өте қызықты, - дейді А. Селинкин. Сондай-ақ, ТЖД қызметкері жұмыс барысында бетпе-бет келген қилы жағдайлар мен алғашқы сапарларын еске түсірді.
Аймақтық азаматтық қорғаныс басқармасындағы құтқарушылар өз жұмыстарын журналистер назарына ұсынып, қызметкерлердің металды кесіп, зардап шеккендерді құтқарғанын және эвакуациялау барысын, өртенген жердегі үйінділерді аршу кезінде қалай жұмыс істейтіндігін көрсетті.
Баспасөз турында БАҚ өкілдері аялдаған келесі мекеме №5 өрт сөндіру бөлімі болды. Онда нақты уақытта шартты өртті сөндіру және адамдарды эвакуациялау имитациясы жүргізілді. Журналистер құтқарушылардың іс-әрекеттерін бақылап қана қоймай, оқу-жаттығу жұмыстарына белсенді қатысуға мүмкіндік алды. Яғни, олар арнайы костюмдерді киіп көріп, тіпті өрт ошақтарын сөндіру бойынша тапсырмаларды орындауға тырысты.
Арнайы ұйымдастырылған баспасөз туры қатысушыларға құтқарушылар жұмысының ерекшелігін тереңірек түсінуге және төтенше жағдайларға дайындықтың маңыздылығын бағамдауға мүмкіндік бергені сөзсіз.
#Семей, #Абайская область, #спасатели
