Семейде Тұрғын үй-коммуналдық шаруашылығы қызметкерлері күні аталып өтті
Семей қаласында Тұрғын үй-коммуналдық шаруашылығы қызметкерлерінің кәсіби мерекесі қалалық мәдениет сарайында кең көлемде аталып өтті,-деп хабарлайды abaidan.kz ақпараттық агенттігі. Мерекелік жиынға көпқабатты үйлердің күтімі мен басқаруына жауапты «ПИК» (Пәтер иелері кооперативі), «МИБ» (мүлік иелері бірлестігі), «ЖС» (Жай серіктестік) жетекшілері және сала ардагерлері шақырылды.
Мерекелік шараға қала әкімінің орынбасары Қуаныш Әбілдаев арнайы қатысып, сала ардагерлері мен үздік қызметкерлерді кәсіби мерекелерімен құттықтады. Саланың маңыздылығына тоқталып, қызметкерлердің күнделікті еңбегі – қаланың тазалығы мен жайлылығының кепілі екенін атап өтті. Ол алдағы уақытта да сала мамандарын қолдау шаралары жалғасатынын жеткізді. Сондай-ақ Тұрғын үй-коммуналдық шаруашылығы қызметкерлеріне Семей қаласы әкімінің Құрмет грамоталары мен Алғыс хаттарын табыстады. Марапат иелерінің қатарында жылдар бойы адал еңбек етіп, тұрғындардың жайлы өмір сүруіне үлес қосып жүрген сала мамандары бар.
Бұл салада еңбек ету – үлкен жауапкершілік пен жанашырлықты қажет етеді. Қаланың тазалығы, тұрғын үйлердің жағдайы, инфрақұрылымның тұрақты жұмыс істеуі – осы мамандардың күнделікті тынымсыз еңбегінің нәтижесі, Бұл шара аталмыш салада қажырлы еңбек етіп жүрген азаматтардың еңбегін бағалау мақсатында ұйымдастырылды,-дейді қалалық тұрғын үй-коммуналдық шаруашылығы бөлімінің басшысы Диана Шаяхметова.
Қатысушылар өзара пікір алмасып, кәсіби мерекені бірлесіп атап өтуге мүмкіндік алғандары үшін алғыс білдірді.
Мереке соңы қалалық мәдениет сарайы әртістерінің концертіне ұласты.
#Семей, #Абайская область, #ЖКХ
