Су қоймалары мен өзендер көктемгі су тасқынына дайын ба – Министрлік жауабы
Су ресурстары және ирригация министрлігі Қазақстанның су қоймалары мен өзендері көктемгі су тасқынына дайын ба деген сұраққа жауап берді, деп хабарлайды abaidan.kz тілшісі Kazinform сілтеме жасап.
«2023 жылы оңтүстік аймақтарда вегетация өте құрғақ болды. Су тапшылығы байқалды. Еліміздің оңтүстігіндегі барлық дерлік су қоймалары пайдасыз көлемге дейін жұмыс істеді. Қазгидрометтің күзгі-қысқы болжамы бойынша барлық су қоймаларымыз толтыру режимінде жұмыс істеуде. Қазіргі уақытта олар 60-70%-ға толды. Біздің су қоймаларымыз ағынды реттеу үшін су көлемін қабылдауға дайын», - деді министрліктің Су шаруашылығы комитеті төрағасының орынбасары Гүлмира Имашева Sputnik Қазақстан мультимедиялық баспасөз орталығында өткен дөңгелек үстелде.
Мысал ретінде спикер транзиттік режимде жұмыс істейтін Тасөткел су қоймасын айтты. Оның қазіргі көлемі – 301 миллион текше метр.
«Келіп жатқан барлық су төменгі ағысқа төгіледі. Осылайша, біз тасқын суды қабылдауға дайындалып жатырмыз», - деді спикер.
Ең ірі су қоймаларының бірі Шардарадағы су көлемі бүгінде 2,5 текше шақырымды құрайды. Өткен жылдың дәл осы күні көлем 4,1 текше шақырым болған еді.
«Су тасқыны – табиғи процесс. Мұның бәрі ауа райының қандай болатынына байланысты. Бірақ министрлік пен аумақтық бөлімшелер тарапынан күнделікті мониторинг жүргізіледі. Біз судың көлемі мен ағынын бақылап отырмыз. Барлық ірі су қоймаларында вегетациялық кезеңге арналған жұмыс кестесі әзірленді, онда біз 1 сәуірге, вегетациялық кезеңнің басталуына қарай қажетті көлемді жинайтынымыз жазылған», - деп толықтырды Гүлмира Имашева.
