Су ағызып әкеткен азаматтың әкесі президенттен көмек сұрады
Аягөз ауданы, Қарағаш ауылының тұрғын Шалқар Қажыгерев пен қасындағы серігі Қуанышбек Мырзағазиннің 26 наурыздан бастап, іздестіріліп жатқанымен, әлі табылар емес,-деп хабарлайды abaidan.kz тілшісі. Абай облысы, ТЖБ мамандары, әскери бөлімше сарбаздары және ауыл тұрғындары жаппай іздестіру жұмыстарын жүргізіп жатқанымен, әлі күнге нәтиже жоқ. Екі азаматтан бөлек 46 жастағы тағы бір азамат 23 наурызда Аягөз өзенін атпен кешіп өтпек болғанда, толқын ағызып әкеткен күйі ол да із-түзсіз жоғалып кетті.
Ал Шалқар Қажыгеревтің әкесі Тұрсынғали ақсақал іздеу жұмыстары созылып бара жатқандықтан, Президент Қасым-Жомарт Тоқаевтан тікелей көмек сұрап, мәлімдеме жариялауға мәжбүр болды. Т. Қажыгереевтің айтуынша, алғашында екі азаматты құтқаруға мүмкіндік болған. Алайда, 112-ге бірнеше рет хабарлама түсіргенімен, ТЖБ тарапынан жауап болмаған.
-Құрметті, Қасым-жомарт Кемелұлы! Біз отбасымызбен ауыр жағдайға ұшырап отырмыз. 26 наурыз күні таңғы 6-да ауырған малшыны ауруханаға апарам деп трактормен шыққан балам су ортасына келгенде трактор өшіп қалып, кешкі алтыға дейін (сағат 18-00-авт) тұрып қалды. Мен ести сала сағат 7-00 ден бастап, дабыл қақтым. 112-ге бірнеше рет қоңырау шалып, әрең алдым. Ондағылар «МЧС»-қа хабарласыңдар деді. Хабарластық. Бірақ, сол күні ешқандай жерден көмек болмады. Ақыр аяғында трактор аударылып, малшы мен менің балам суға ағып кетті. Ауылдан шыққан еріктілер мен әскерилер көмегімен түні бойы іздедік, таппадық. Әлі табылмай жатыр... Күшіміз азайып бара жатыр,-деді Т. Қажыгереев. Суға кеткен азаматтың әкесі ары қарай да іздестіру үшін әуеден бақылайтын дрон мен иісшіл иттер әкелінуін сұрап отыр. Өйткені, өз күштерімен іздестіруге енді мүмкіншілік жоқ. Шалқар Тұрсынғалиұлы отбасылы азамат, жары мен төрт баласы әлі күнге дейін әлдебір үмітпен күтіп отыр.
Бүгін облыстық ТЖБ Ақсуат ауданы «Шаң» қыстауынан 29 наурыз күні таңғы 8-де Кіндікті ауылына атпен шыққан атасы мен немересінің байланыссыз, қайда жүргені белгісіз болып отырғаны туралы кеше сағат 22:10-да хабарлама түскен. Қорғаныс министрлігінен жіберілген МИ-17 тікұшағының көмегімен 1965 жылы туған азамат 11 жастағы немересімен бірге дер кезінде табылып, Кіндікті ауылына жеткізілді.
#Абайская область, #Президент РК, #Аягоз, #ДЧС, #талая вода
