Қорғаныс министрінің бірінші орынбасары тағайындалды
Сұлтан Қамалетдинов қорғаныс министрінің бірінші орынбасары – ҚР Қарулы Күштері Бас штабының бастығы болып тағайындалды, деп хабарлайды Ақордаға сілтеме жасап, abaidan.kz . "Мемлекет басшысының өкімімен Сұлтан Бүркітбайұлы Қамалетдинов Қазақстан Республикасы Қорғаныс министрінің бірінші орынбасары – Қазақстан Республикасы Қарулы Күштері Бас штабының бастығы болып тағайындалды, ол бұрынғы атқарған лауазымынан босатылды", - делінген Өкімде. Сондай-ақ бұл лауазымнан Марат Құсайынов босатылғаны туралы өкім шықты. "Мемлекет басшысының өкімімен Марат Рақымұлы Құсайынов Қазақстан Республикасы Қорғаныс министрінің бірінші орынбасары – Қазақстан Республикасы Қарулы Күштері Бас штабының бастығы лауазымынан босатылды", - делінген өкімде. Ақорда мемлекет басшысының өкімімен Русланбек Бекжігітов Қазақстан Республикасы Қауіпсіздік Кеңесінің Әскери қауіпсіздік және қорғаныс бөлімінің меңгерушісі лауазымынан босатылғаны туралы өкімді де жариялады. Сұлтан Қамалетдинов 1965 жылы 12 ақпанда Астрахан облысында (Ресей) дүниеге келген. 1986 жылы Ташкент жоғары танк командалық училищесін тәмамдаған. Қызметін ГСВГ танк дивизиясының гвардиялық танк полкінің танк взводының командирі болып бастады. Әр жылдары танк батальонының, танк полкінің, механикаландырылған бригаданың командирі болып қызмет етті. 2006-2008 жылдары "Шығыс" өңірлік қолбасшылығы әскерлері қолбасшысының басқару штабы бастығының орынбасары болды. 2008 жылдың қаңтар айынан тамыз айына дейін "Оңтүстік" өңірлік қолбасшылығы әскерлері қолбасшысының жауынгерлік даярлық жөніндегі орынбасары болып қызмет атқарды. 2010 жылы "Оңтүстік" өңірлік қолбасшылығы әскерлерінің қолбасшысы басқармасының штаб бастығы болып тағайындалды. 2013-2016 жылдары "Астана" өңірлік қолбасшылығының әскерлерін басқарды. 2019-2021 жылдары ҚР Тұңғыш Президенті атындағы Ұлттық қорғаныс университетінің бастығы, 2021 жылғы қарашадан бастап – Қазақстан Республикасы Қорғаныс министрінің орынбасары болды. 2020 жылғы 5 мамырда Қазақстан Республикасы Президентінің жарлығымен генерал-лейтенант әскери атағы берілді ІІ дәрежелі "Даңқ" ордені (2017) Мерейтойлық медальдар Еңбек сіңірген жылдары үшін медальдар
#тағайындау, #Қорғаныс Министрі
