Қазақстан Республикасы жаңа Конституциясының 87-бабында жергілікті мемлекеттік басқаруды тиісті аумақтағы ахуалға жауапты жергілікті өкілді және атқарушы органдар жүзеге асыратыны көрсетілген.
Бұл норма жергілікті биліктің халық алдындағы жауапкершілігін айқындайды. Оның негізгі мақсаты – өңірлер мен елді мекендердегі әлеуметтік-экономикалық мәселелерді тиімді шешу және тұрғындардың өмір сүру сапасын жақсарту.
Жергілікті өкілді органдар – мәслихаттар халықтың мүддесін білдіріп, жергілікті мәселелердің шешілуіне бақылау жасайды. Ал жергілікті атқарушы органдар – әкімдіктер аумақты дамыту, инфрақұрылымды жетілдіру және әлеуметтік бағдарламаларды жүзеге асыру бағытында жұмыс істейді.
87-баптың маңызы – жергілікті басқарудың нәтижесі қағаз жүзіндегі есептермен емес, халықтың күнделікті өміріндегі нақты өзгерістермен бағалануы керектігінде. Жол сапасы, ауызсу мәселесі, қоғамдық қызметтердің қолжетімділігі және тұрғындардың өтініштеріне жауап беру – тиімді басқарудың маңызды көрсеткіштері.
Сонымен қатар жергілікті биліктің ашықтығы, халықпен байланысы және қоғамдық бақылау тетіктерінің тиімділігі де ерекше мәнге ие.
Конституцияның 87-бабы жергілікті мемлекеттік басқарудың басты қағидаларының бірі – аумақтың жағдайына жауапкершілікті бекітеді. Бұл норманың тиімділігі жергілікті органдардың халық мүддесіне сай шешім қабылдап, нақты нәтижеге қол жеткізуіне байланысты.
