Абай облысында ауа райы қолайсыздығына байланысты 60-қа жуық адам жолда қалды
Абай облысында жолда қалған 60-қа жуық адам жылыту бекетіне жеткізілді,-деп хабарлайды abaidan.kz ақпараттық агенттігі Kazinform-ға сілтеме жасап.
Облыстық полиция департаменті баспасөз қызметінің мәліметіне сүйенсек, Шар қаласының теміржол станциясына Қызылорда-Семей бағытындағы пойызбен келген жолаушылар ары қарай жұмыс бабымен Шығыс Қазақстан облысына жол тартуы тиіс болған.
Алайда қолайсыз ауа райына байланысты республикалық маңызы бар «Омбы-Майқапшағай» тасжолы жабылып, жұмыс беруші мекеменің автокөліктері Семей қаласынан шыға алмай қалған.
— Қиын жағдайға тап болған азаматтар шұғыл түрде «102» арнасына хабарласып, көмек сұрады. Тәртіп сақшылары келіп жетіп, оларды Шар қаласындағы спорт кешеніндегі жылыту бекетіне орналастырды. Азаматтарға қажетті жағдай жасалып, олардың өмірі мен денсаулығына төнген қауіптің алдын алу бойынша тиісті шаралар қабылданды, — делінген ақпаратта.
