Қазақстан Республикасы Президентінің жанындағы Мемлекеттік басқару академиясының Абай облысы бойынша филиалында мемлекеттік қызметшілер арасында кітап оқу мәдениетін қалыптастыруға бағытталған ақпараттық-түсіндіру жұмысы жүргізілді.
Филиал директоры Алуа Сабалақова қайта даярлау курсының тыңдаушыларымен кездесу өткізіп, оларды «Оқитын ұлт» республикалық кітап оқу марафонына белсенді қатысуға шақырды.
Іс-шараның негізгі мақсаты – мемлекеттік қызметшілер арасында кітап оқу мәдениетін қалыптастыру, олардың кәсіби және тұлғалық дамуына қолдау көрсету, сондай-ақ білімге, ізденіске және үздіксіз дамуға деген қызығушылығын арттыру.
Кездесу барысында тыңдаушылар «Оқитын ұлт» республикалық кітап оқу марафонының мақсат-міндеттерімен, қатысу шарттарымен және «Оқитын мемлекеттік қызметші» бағытымен танысты. Сонымен қатар марафон аясында ұсынылған әдебиеттер тізімі, қатысу форматы мен жобаның негізгі кезеңдері кеңінен түсіндірілді.
Кітап оқу – кәсіби дамудың маңызды құралы
Кездесу барысында кітап оқудың мемлекеттік қызметшінің кәсіби қызметіндегі маңызына ерекше назар аударылды. Көркем және танымдық әдебиеттерді жүйелі оқу адамның дүниетанымы мен ой-өрісін кеңейтіп қана қоймай, аналитикалық және сыни ойлау қабілетін дамытуға ықпал етеді.
Кітап оқу арқылы адам ақпаратты сараптауды, әртүрлі көзқарастарды салыстыруды, маңызды мәселелерді тереңірек түсінуді және негізделген қорытынды жасауды үйренеді. Бұл дағдылар мемлекеттік қызметшілердің кәсіби құзыреттілігін арттырып, тиімді әрі салмақты шешім қабылдауына мүмкіндік береді.
«Оқитын мемлекеттік қызметші» бағытының басты мәні де осында. Білімін үнемі толықтырып, жаңа идеяларға ашық, сыни және аналитикалық тұрғыдан ойлайтын, кәсіби дамуға ұмтылатын маман ғана заманауи мемлекеттік қызметтің талаптарына сай бола алады.
Тыңдаушылар өз таңдауымен бөлісті
Кездесу барысында қатысушылар ұсынылған кітаптар тізіміне енген шығармалар туралы өз ой-пікірлерін білдіріп, әдеби туындылардың мазмұны мен бүгінгі қоғам үшін өзектілігі жөнінде пікір алмасты.
Тыңдаушылар кітап оқудың адамның кәсіби қызметіне ғана емес, жеке тұлғалық дамуына да оң әсер ететінін атап өтті. Әр қатысушы марафон аясында оқитын алғашқы кітабын анықтап, кітап оқуды күнделікті өмір салтына айналдырудың маңыздылығын атап өтті.
Бүгінде кітап оқу – бос уақытты тиімді өткізудің бір тәсілі ғана емес, бәсекеге қабілетті, білімді және заманауи маман қалыптастырудың маңызды тетігі. Үнемі ізденетін, жаңа білім мен идеяларға ұмтылатын мемлекеттік қызметші өз кәсіби әлеуетін арттырып қана қоймай, қоғам мен мемлекеттің дамуына қатысты үдерістерді терең түсінуге мүмкіндік алады.
«Оқитын ұлт» марафоны – кітап оқу мәдениетін кеңінен насихаттап, білімге ұмтылған қоғам қалыптастыруға бағытталған маңызды бастама. Ал «Оқитын мемлекеттік қызметші» – осы бастаманың аясында мемлекеттік қызметшілердің зияткерлік әлеуетін арттыруға, кәсіби және тұлғалық дамуына ықпал ететін мазмұнды бағыт.
Кітап оқитын, ізденетін және үнемі дамуға ұмтылатын мемлекеттік қызметші – елдің сапалы мемлекеттік басқару жүйесінің маңызды құрамдас бөлігі.