Тәуелсіздіктің темірқазығы Ата Заңымызға – 30 жыл
Бүгін Қазақстан Республикасының Конституциясы қабылданғанына 30 жыл толып отыр. 1995 жылы осы күні бүкілхалықтық референдум арқылы елдің Негізгі заңы бекітіліп, Тәуелсіз Қазақстанның құқықтық іргетасы қаланды. Тарихи құжат еліміздегі барлық заңдардың бастауы, қоғамдық келісім мен тұрақтылықтың кепіліне айналды,-деп хабарлайды abaidan.kz ақпараттық агенттігі.
Конституция – мемлекеттің негізгі заңы ғана емес, елдің даму бағытын айқындайтын саяси бағдар. Қазақстан Ата Заңының 1-бабында: «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады» деп көрсетілген.
Бұл қағида – адам мен азаматтың құқықтары мен бостандықтарын қорғауды басты орынға қойған мемлекеттің бағыт-бағдарын нақтылап береді.
Құқықтық жүйенің қалыптасуы, мемлекеттік билік тармақтарының – заң шығару, атқару және сот жүйелерінің – өзара тәуелсіздігі мен үйлесімді жұмыс істеуі де осы Конституцияда анық жазылған.
Соңғы отыз ішінде еліміз саяси, экономикалық және әлеуметтік тұрғыдан үлкен өзгерістерді бастан кешірді. Бұл өзгерістердің барлығы Конституцияға сүйеніп жүзеге асырылды.
Осы жылдар ішінде Ата Заңға бірнеше рет толықтырулар мен түзетулер енгізілді. Әсіресе соңғы реформалар елдегі саяси жүйені жаңғыртуға, азаматтардың ел басқаруға қатысуын арттыруға, Парламенттің рөлін күшейтуге бағытталды.
Мемлекет басшысы Қасым-Жомарт Тоқаев атап өткендей, Конституциялық реформа – «Жаңа, Әділетті Қазақстан» құру жолындағы басты қадамдардың бірі болды.
Қазақстан халқы үшін Ата Заң – жай ғана заңдар жиынтығы емес. Бұл – мемлекеттіліктің, тәуелсіздіктің, азаматтық татулық пен қоғамдық келісімнің символы. Конституция әрбір қазақстандыққа тең құқықтар мен мүмкіндіктер береді, заң алдында барша азаматтардың тең екенін айқындайды.
Ата Заңымыздың қабылдануы – еліміздің тарихындағы ең маңызды оқиғалардың бірі. Конституция арқылы Қазақстан демократиялық даму жолына түсті, өзінің болашағын заң аясында құруға бекем бел буды. Ендігі міндет – осы заңдарды сақтап, оларды жетілдіру арқылы әділетті, өркениетті қоғам құру.
