Семей қаласында жылыту маусымы аяқталады
Семей қаласының әкімдігі ауа райының тұрақталуына байланысты 2026 жылғы 21 сәуірден бастап қалада жылу беру тоқтатылатындығын хабарлайды. Ведомство мәліметінше, 2025–2026 жылдардағы жылыту маусымы тұрақты өтті: жылу жүйелеріндегі барлық жұмыстар уақытылы жүргізіліп, нысандар штаттық режимде жұмыс істеді.
Жылыту маусымын аяқтау Абай облысында бекітілген қағидаларға сәйкес жүзеге асырылады. Аталған талаптарға сай, сыртқы ауаның орташа тәуліктік температурасы +10 °C-тан төмен емес деңгейде тұрақтап, әрі қарай жоғарылаған жағдайда, жылыту жергілікті атқарушы органның қаулысы негізінде тоқтатылады.
Маусым аяқталғаннан кейін тұрғын үйлерге ыстық су кезең-кезеңімен беріле бастайды. Қала бойынша 601 тұрғын үй, яғни 40 мыңнан астам абонент ыстық сумен қамтамасыз етіледі.
