Абай - халықтың рухани тірегі
Ұлы ақыны, ойшыл, ағартушы Абай Құнанбайұлының туғанына 180 жыл толуына орай ел көлемінде және халықаралық деңгейде ауқымды іс-шаралар өткізіліп, рухани орда – Абай елінде дүбірлі той ұйымдастырылды. Мерекеге арнайы келген өнер иелері, зиялы қауым өкілдері, Абай мұрасына құрметпен қарайтын көпшілік бұл шараның жоғары деңгейде өткенін ерекше атап өтті.
Мерейтой аясында ұйымдастырылған салтанатты концерт пен рухани кештерде елге танымал әншілер өнер көрсетті. Олар Абай әндерін орындап, ақын сөзіне жазылған туындылар арқылы көрерменге ерекше әсер сыйлады. Әншілердің айтуынша, Абай – қазақтың ғана емес, бүкіл адамзаттың ортақ данасы. Оның әрбір өлеңі мен қара сөзі – терең философия, тәрбие мен тағылымның көзі.
Абай елінде туып-өскен кейбір әншілер үшін бұл мерейтойдың жөні бөлек. Олар туған топырақтың топжарған тұлғасына тағзым етіп, өз өнерін халыққа арнады. Солардың бірі - “Алатау серілері” тобының солисті Жасұлан Қазақия. Ұлы ақынның сөзін өлеңмен, сазбен жеткізу – үлкен жауапкершілік пен құрмет екенін атап өтті. Әншілер үшін бұл тек өнер көрсету ғана емес, Абай рухымен тілдесу, оның аманатын бүгінгі ұрпаққа жеткізу миссиясы болды.
Абайдың рухани мұрасы – қазақ халқының мәңгілік байлығы. Оның еңбектері бүгінгі күні де өз маңызын жоғалтқан жоқ. Керісінше, заманауи қоғамда адамгершілік, білім, еңбек, адалдық секілді құндылықтарды дәріптеуде Абай сөзі – темірқазық. Сондықтан да, ұлы ақынның 180 жылдық мерейтойы – өткенді бағалау ғана емес, болашаққа бағдар бола білді.
Мерейтой аясындағы шаралар – Абай рухын дәріптеу мен оның өсиетін ұрпақ жадында жаңғыртудың бір көрінісі. Бұл – елдіктің, бірліктің, руханияттың тойы. Ұлы даланың Ұлы перзенті – Абайға деген құрмет ешқашан сарқылмақ емес.
#Абайская область, #180 лет со дня рождения Абая Кунанбаева
