Абай облысында Қазақстан Республикасы Құрылтайы депутаттарын сайлау бойынша дауыс беру аяқталды. Жергілікті уақыт бойынша сағат 20:00-де сайлау учаскелері жабылып, учаскелік сайлау комиссиялары дауыстарды санау рәсіміне кірісті.
Күні бойы Абай облысының тұрғындары өздерінің конституциялық құқықтарын жүзеге асырып, дауыс беруге қатысты. Сайлау учаскелері сағат 07:00-ден 20:00-ге дейін жұмыс істеді. Орталық сайлау комиссиясының мәліметінше, сағат 18:00-дегі жағдай бойынша облыстағы сайлаушылардың дауыс беруге қатысу белсенділігі 77,54 пайызды құрады.
Дауыс беру аяқталғаннан кейін учаскелік комиссия мүшелері бюллетеньдерді санау рәсіміне кірісті. Бұл кезеңде сайлау құжаттары белгіленген тәртіппен тексеріліп, берілген дауыстар саналады және тиісті хаттамалар рәсімделеді.
Дауыстарды санау сайлау учаскелері жабылғаннан кейін бірден басталады. Учаскелік сайлау комиссияларының жұмысы аяқталған соң дауыс беру нәтижелері туралы мәліметтер одан әрі қорытындылау үшін аумақтық сайлау комиссияларына ұсынылады.
Бүгінгі күн сайлау науқанының маңызды кезеңдерінің бірі болды. Енді қоғам назарында дауыс беру қорытындылары. Сайлаудың түпкілікті нәтижелері заңнамада белгіленген барлық рәсімдер аяқталып, сайлау комиссияларының хаттамалары өңделгеннен кейін анықталады.
