Ұлттық басымдықтар және өңірлік университеттердің жаңа жауапкершілігі
Мемлекет басшысының республикалық «Түркістан» газетінде жарияланған сұхбаты ел дамуының қазіргі кезеңіндегі стратегиялық логиканы айқын көрсетіп берді. Бұл сұхбатта жекелеген бастамалар емес, тұтас даму архитектурасы жүйеленді. Ең бастысы – Қазақстан дамуы декларативті ұстанымдар кезеңінен нақты іске асыру кезеңіне өткенін аңғартады. Бұл туралы Шәкәрім университетінің ректоры Думан Орынбеков мәлімдеді,-деп хабарлайды abaidan.kz ақпараттық агенттігі.
Президент айқындаған басымдықтар – ғылымды экономикалық активке айналдыру, кадрларды негізгі стратегиялық ресурс ретінде қарастыру, жасанды интеллектіні ұзақ мерзімді өркениеттік таңдау деп тану, тиімділік пен нақты нәтижені басты өлшем ету, өңірлерді өсімнің нақты кеңістігі ретінде дамыту – жоғары білім жүйесіне, әсіресе өңірлік университеттерге тікелей жауапкершілік жүктейді.
Бүгінгі таңда университет енді тек білім беретін мекеме емес. Ол – экономикалық, технологиялық және әлеуметтік шешімдер шығаратын интеллектуалдық орталық. Осы тұрғыда өңірлік университеттердің рөлі ерекше. Себебі нақты экономика, нақты өндіріс, нақты әлеуметтік мәселелер – бәрі өңірлерде шоғырланған.
Президент белгілеген логика негізінде 2026 жылға арналған міндеттер матрицасын айқын көруге болады.
Бірінші – кадрлар. Университет даярлайтын мамандар өңір мен ел экономикасының нақты сұранысына сай болуы тиіс. Бұл дегеніміз – теориядан гөрі практикалық құзыреттерге, цифрлық дағдыларға, бейімделу қабілетіне басымдық беру. Болашақ маман өзгермелі ортада жұмыс істей алуы керек.
Екінші – ғылым. Ғылыми зерттеулер абстрактілі емес, өңірлік сұранысқа бағытталған қолданбалы сипатта болуы қажет. Агроөнеркәсіптік кешен, экология, энергетика, логистика, әлеуметтік процестер – ғылым нақты міндеттерді шешудің құралына айналуы тиіс.
Үшінші – жасанды интеллект. AI – тек технологиялық тренд емес, басқару мен білім беру философиясын өзгертетін фактор. Университет басқаруына, оқу процесіне және ғылыми қызметке жасанды интеллектіні енгізу – уақыт талабы. Сонымен қатар барлық білім алушылар үшін AI-сауаттылық базалық дағдыға айналуы керек.
Төртінші – басқару. Data-driven басқару моделіне көшу – тиімділіктің негізгі шарты. Ашық көрсеткіштер, цифрлық құралдар, өлшенетін нәтиже университет қызметінің барлық бағытын қамтуы тиіс.
Бесінші – өңірмен байланыс. Университет өңірдің интеллектуалдық орталығына айналуы қажет. Бұл – сараптамалық қолдау, басқарушылық шешімдерді сүйемелдеу, экономикалық жобаларға қатысу арқылы жүзеге асады.
Алтыншы – білім беру бағдарламалары. 2030 жылдан кейінгі экономика талаптарына сай бағдарламаларды жаңарту – стратегиялық міндет. Пәнаралық тәсілдер, технологиялық компоненттер, жүйелі ойлау дағдылары білім мазмұнының өзегіне айналуы тиіс.
Жетінші – құндылықтар. Технологиялық даму адами және этикалық өлшемдермен қатар жүруі керек. Бұл тұрғыда «Толық адам» қағидаты – университеттің тәрбиелік және дүниетанымдық негізі.
Осы стратегиялық контекстте Шәкәрім университеті 2026 жылғы жұмысын бастайды. Мемлекет басшысы көрсеткен бағдар – біз үшін нақты әрекетке айналуы тиіс жол картасы. Біздің міндет – ұлттық басымдықтарды басқарушылық шешімдерге, ал оларды өлшенетін, қоғамға пайдалы практикалық нәтижелерге айналдыру.
Университеттің күші – білімде ғана емес, жауапкершілікте. Ал жауапкершілік – ел дамуына нақты үлес қоса білуде.
#Семей, #Абай облысы, #ҚР Президенті, #Шәкәрім
