Абай облысында жол қауіпсіздігі бойынша бақылау күшейтілді
Абай облысында жол-көлік оқиғаларын болдырмау және тұрғындардың қауіпсіздігін қамтамасыз ету бағытында бірқатар шара қабылданды. Бұл туралы Өңірлік коммуникациялар қызметінде өткен баспасөз мәслихатында Абай облысы ПД Әкімшілік полиция басқармасы бастығының орынбасары, полиция майоры Данияр Нұрпейісов мәлімдеді.
Спикердің айтуынша, полиция қызметкерлері жол қозғалысы қарқынды учаскелерде, жаяу жүргіншілер өткелдерінде және қоғамдық орындарда бақылауды күшейтті. Құқық бұзушылықтарды анықтау үшін дрондар қолданылып, қауіп төндіретін қозғалыстар, сондай-ақ жаяу жүргіншілерге жол бермеу деректері тіркелді.
– Өткен жылы облыс аумағында 1134 жол-көлік оқиғасы тіркелді. Жол қозғалысы ережелерін бұзған 3783 жаяу жүргінші анықталды. Құқық бұзушылықтардың көбі белгіленбеген жерден жолды кесіп өту, бағдаршам талаптарын сақтамау және абайсыздық салдарынан болған, – деді Данияр Нұрпейісов.
Сонымен қатар жаяу жүргіншілер өткелінде жол бермеген 4879 жүргізуші жауапкершілікке тартылды. Құқық бұзушыларға қатысты тиісті шаралар қолданылып, жол қозғалысындағы тәртіп пен қауіпсіздік талаптары түсіндірілді. Сондай-ақ білім беру ұйымдары мен еңбек ұжымдарында профилактикалық іс-шаралар өтті.
