Абайдың тойы – мәңгілік даналықтың тойы
Абай Құнанбайұлы – қазақ халқының ғана емес, күллі түркі дүниесінің мәңгілік шамшырағы, кемеңгер ойшылы. Оның әрбір сөзі – ғасырлар бойы өзектілігін жоғалтпай келе жатқан рухани қазына.
Абай тойы – тек ақынның туған күнін атап өту ғана емес. Бұл – оның өлмес өлеңіне, өрелі ойына, өміршең мұрасына тағзым ету, ұрпақ санасына даналық дәнін егу. Абайдың тойы – даналыққа, адамгершілікке, әділетке, ғылым мен білімге бастайтын жол. Ол – адам болудың, кісілік пен кемелдіктің мерекесі.
Абайдың әрбір шығармасы – өмір сабағы. Оның «Толық адам» ілімі, «қара сөздері», табиғат лирикасы, махаббат жырлары – бүгінгі ұрпақ үшін мәңгілік бағдаршам. Бұл той – соны қайтадан ұғыну, жаңаша қабылдау, Абайды тек оқу емес, оны тірі тұлғадай сезіну.
Қазақ қоғамы үшін Абай – елдік пен еркіндіктің, парасат пен пайымның символы. Ол – бізге өз тілімізді, дінімізді, ділімізді сақтау жолын көрсеткен темірқазық. Сондықтан Абайдың тойын атап өту – ұлттың өзін қайта тануы, түлеуі.
Мәңгілік ел боламыз десек, мәңгілік даналыққа айналған Абайды танудан, оқудан, оны ұлықтаудан шаршамауымыз керек. Абайдың тойы – тарихтың, мәдениеттің, ұлттық рухтың ұлы мерекесі. Ол – өткеннің ғана емес, бүгіннің және болашақтың да тойы.
Шежіреші-қаламгер, тарихшы Молдабек Жанболатовтың«Абайдың тойы – мәңгілік даналықтың тойы» деген сөзі – терең мағыналы, ұлт руханиятының тамырына бойлайтын тұжырым.
#Абай облысы, #Абай Құнанбайұлының туғанына 180 жыл
