Семей қаласында Халықаралық қарттар күніне орай «Қарттарға құрмет – ұрпаққа міндет» атты мерекелік іс-шара өтті. Аға буын өкілдеріне құрмет көрсетуге арналған жиынға қала әкімі Әділет Қожанбаев, еңбек ардагерлері мен қарттар қатысты.
Қала басшысы жиналған қауымды мерекемен құттықтап, ардагерлердің қаланың әлеуметтік-экономикалық дамуына қосқан үлесін, жас ұрпақ тәрбиесіндегі өнегелі орнын атап өтті.
«Семейдің өсіп-өркендеуіне, өндірісі мен шаруашылығының дамуына, білім мен мәдениетінің биіктеуіне әрқайсыңыз өз үлестеріңізді қостыңыздар. Ұстаз болып шәкірт тәрбиеледіңіздер, дәрігер болып адам жанына араша түстіңіздер, еңбек адамы болып қаламыздың іргесін бекіттіңіздер. Отбасында ұл-қыз өсіріп, оларға адалдық пен жауапкершілікті, елге қызмет етудің мәнін үйреттіңіздер. Бүгінгі ұрпақ сол еңбектің игілігін көріп отыр. Сондықтан сіздерге көрсетілер құрметтің негізінде ең алдымен үлкен ризашылық жатыр», – деді Әділет Нұрсағатұлы.
Қазіргі уақытта Семей қаласында 57 мыңнан астам қарт азамат тұрады. Қала аумағында 200-ге жуық бастауыш ардагерлер ұйымы белсенді қызмет атқарып келеді. Қала әкімі аға буын өкілдерінің қоғамдық өмірге араласуы, өмірлік тәжірибесі мен ақыл-кеңесі ұрпақтар сабақтастығын нығайтуда ерекше маңызға ие екенін жеткізді. Мерекелік іс-шара барысында бірқатар ардагер қала әкімінің Құрмет грамотасымен марапатталды. Өз кезегінде аға буын өкілдері көрсетілген құрмет пен ықылас үшін алғыстарын білдірді.
