"Қазақфильмге" қатысты Аида Балаева мәлімдеме жасады
Мәдениет және ақпарат министрі Аида Балаева "Қазақфильм" киностудиясына қатысты қоғамда тарап жатқан қауесеттерге қатысты пікір білдіріп, оның алдағы қызметінің кейбір қыр-сырын ашып берді, деп хабарлайды abaidan.kz ақпараттық агенттігі Zakon.kz сілтеме жасап.
Министр ең алдымен "Қазақфильмнің" тағдыры жұртшылықты алаңдатып отырғанына қуанышты екенін айтты.
Жұртшылықтың "Қазақфильмнің" тағдырына осынша алаңдаушылық білдіріп отырғаны қуантады. Сондықтан қоғамдағы осы алаңдаушылыққа себеп болып отырған мәселелерге қатысты түсініктеме беруді жөн деп санаймын. Ең алдымен айтарым, кино саласына қатысы бар тұлғалардың киностудия төңірегіндегі процестерге қатысты өз пікірін білдіруге құқығы бар. Алайда ақпарат таратқанда тек фактілерге сүйенуге кеңес беремін. "Заң мен тәртіп" қағидаты баршаға ортақ, ал оны елемеу тиісті заң аясында жауапкершілікке әкеліп соғады, – деп Аида Балаева 26 наурызда Facebook желісінде жазды.
Содан кейін ол киностудия төңірегінде айтылып жатқан қауесеттерге түсініктеме берді.
Бірінші. "Қазақфильм" жерінің сатылуы жөніндегі ақпаратқа қатысты.
"Бұл мәселе төңірегіндегі негізсіз қауесет біржола тоқтатылуы тиіс. "Қазақфильмге" тиесілі жерлер киностудия иелігінде қала береді. Жер сатылған жоқ және тек кинематография мүддесі үшін пайдаланылуда."Аида Балаева
Екінші. Киностудияны жөндеуге қомақты қаржы салуға дайын инвесторлардың бар екені жайлы.
Бұл ақпарат қоғамда кең тарап жүр, алайда мұндай мәлімдемелерді құжаттармен немесе нақты кепілдіктермен растай алмайтын адамдар жасап отыр, – деп ойын жеткізді министр.
"Мемлекет, яғни Мәдениет және ақпарат министрлігі нақты инвесторлармен жұмыс істеуге дайын. Дегенмен әзірге ешқандай нақты ұсыныс, бірде-бір кепілдік хаты жоқ. Барлығы тек әңгіме деңгейінде."Аида Балаева
Үшінші. Киностудияны Астанаға көшіру туралы.
"Бұл да ешқандай негізі жоқ қауесет. Қазіргі уақытта елордаға "Қазақанимация" шығармашылық бірлестігін көшіру мүмкіндігі қарастырылып жатыр. Мұнда маңызды жайт – "Қазақанимация" өндірістік база емес, анимациялық контент жасауға тапсырыстарды бөлетін құрылым. Сондықтан оның Астанаға көшуі саланың жұмысына еш кедергі келтірмейді."Аида Балаева
Өкінішке қарай, кейінгі бес жылда елімізде сапалы анимациялық фильмдер түсірілген жоқ. Осыған байланысты анимациялық индустрияны Креативті индустриялар қорының аясында дамыту орынды болмақ. Қор құрылымында анимацияны дамытуға бағытталған креативті хаб жасақталуда, – деп жазды Балаева.
"Бүгінде қазақстандық киноиндустрияда маңызды әрі оң өзгерістер орын алуда. "Қазақфильм" – жай ғана киностудия емес, бұл – қазақ мәдениетінің символы. Сондықтан оны дамыту – басым бағыттың бірі. Президент қол қойған жаңа заңға сәйкес елімізде фильмдерді қаржыландырудың жалпы көлемінің кемінде 30%-ы жыл сайын тікелей "Қазақфильмге" бағытталатын болады. Бұл киностудия жұмысының тиімділігі мен қаржылық тұрақтылығын арттырады."Аида Балаева
Сондай-ақ мемлекеттік қолдауға ие болатын киножобаларды іріктеудің жаңа ережелері бекітілді. Биыл жаңа ережелер бойынша конкурс екінші рет өткізіліп отырғанын алға тартты министр.
"Киностудияны халықаралық ынтымақтастықсыз дамыту мүмкін емес. "Қазақфильм" шетелдік әріптестерімен бірлесіп бірқатар маңызды фильмдер түсіруді жоспарлап отыр. Бұл – қазақстандық киноны әлемдік нарықта таныту және отандық кинематографистердің позициясын нығайту үшін маңызды қадам. Сонымен қатар, демеушілерді тартудың арқасында киностудияда соңғы 15 жылда жүргізілмеген жөндеу жұмыстары басталды. Бұл – инфрақұрылымды жаңғыртудың алғашқы кезеңі. Осы орайда киностудия мен қазақстандық киноөндірістің дамуына үлес қосып жүрген жандарға алғыс білдіремін! Әрине, әңгіме әзірге күрделі жөндеу туралы емес, бірақ бұл – "Қазақфильмде" жұмыс істеу үшін қалыпты жағдай жасауға бағытталған нақты қадамдар."Аида Балаева
Атап айтқым келетіні, "Қазақфильм" тек кинотуындылар ғана емес, ең алдымен – шаруашылық жүргізуші компания және бәсекеге қабілетті нарық қатысушысы, – деп жазды министр.
"Ол жоғары кәсіби киноөнердің дамуына лайықты жағдай жасайды. Сондықтан Министрлік бұл кәсіпорынды режиссер немесе актер емес, киностудия қызметін табысты әрі тиімді жүргізуге қабілетті кәсіби менеджер басқаруы тиіс деген қағиданы берік ұстанады."Аида Балаева
Министрлік өз тарапынан "Қазақфильмнің" тұрақты әрі тиімді дамуын қамтамасыз ету үшін Министрлік жан-жақты қолдау көрсетуді жалғастыра береді, -деп ойын қорытты Балаева.
2025 жылдың 18 наурызында Мәдениет және ақпарат министрі Аида Балаева Қазақстанда жетекші шығармашылық және білім беру ұйымдарының қатысуымен Шығармашылық индустрияны дамыту қорын құру жоспарланып отырғанын хабарлады. Қазақстанның Шығармашылық индустриясын дамыту қорының бюджеті ұлттық лотерея операторының қызметінен 3% мөлшерінде шегерімдер есебінен қалыптастырылатын болады. Оның қызметінің негізгі бағыттарының бірі шығармашылық салалардағы венчурлық инвестицияларды дамыту болады.
