Семейде «Адамзаттың бәрін сүй, бауырым деп…» фестивалі өтеді
1 мамыр – Қазақстан халқының бірлігі күні қарсаңында Семей қаласында ерекше мазмұнға толы мерекелік шара ұйымдастырылмақ. «Семей көктемі» мәдени маусымы аясында өтетін «Адамзаттың бәрін сүй, бауырым деп…» атты достық фестивалі қала тұрғындары мен қонақтарын бірлік пен ынтымақтың жарқын көрінісіне куә болуға шақырады. Мерекелік іс-шара Республика алаңы аумағында өтеді. Бұл күні алаң түрлі мәдениеттер мен дәстүрлер тоғысқан ерекше рухани кеңістікке айналмақ. Ұйымдастырушылар қонақтарға мазмұнды бағдарлама ұсынып, көтеріңкі көңіл күй мен ұмытылмас әсер сыйлауды мақсат етеді. Фестиваль аясында «Достық» атты негізгі мерекелік бағдарлама ұсынылып, ол бірлік пен келісімнің мәнін айшықтайды. Сонымен қатар, «Бірлігіміз – әралуандықта» этноалаңдары арқылы әртүрлі ұлттардың мәдениеті, ұлттық тағамдары мен салт-дәстүрлері таныстырылады. Бұл – көпұлтты қоғамның бай мұрасын дәріптеуге бағытталған маңызды алаң. Балаларға арналған көрме де фестивальдің маңызды бөлігі болмақ. Мұнда бүлдіршіндер достық пен татулықты өз шығармашылықтары арқылы бейнелейді. Ал «Достық кітапханасы» рухани үндестік орнатып, оқырмандарды мәдениеттер диалогына жетелейді. Ұлттық өнерді бағалайтындар үшін «Қолдан жасалған керемет» атты қолөнер көрмесі ұйымдастырылады. Шеберлердің туындылары қазақ халқының бай дәстүрі мен шеберлігін паш етеді. Сонымен қатар, «Sport Life» аймағында спорттық ойындар өткізіліп, белсенді демалысқа мүмкіндік беріледі. Ал «Бірлік» жүгірісі марафоны қатысушыларды ортақ мақсатқа біріктіретін символдық шараға айналмақ. Фестиваль барысында мерекелік сауда және демалыс аймақтары да жұмыс істейді. Қала тұрғындары мен қонақтары үшін бұл күн тек көңілді мереке ғана емес, сонымен қатар мәдени танысу мен рухани жақындасу мүмкіндігіне айналмақ. Шара 1 мамыр күні сағат 11:00-де басталады. Ұйымдастырушылар барша жұртшылықты осы ерекше мерекеде бас қосып, бірлік пен достықтың қадірін бірге сезінуге шақырады.
#Семей, #Фестиваль, #1 мамыр - Қазақстан халқының Бірлігі күні
