«Ұлы дала жорығы» халықаралық марафон-бəйгесінде 10-нан астам елден келетін шабандоздар 500 шақырымға жарысады
Қазақстанда 5-ші Дүниежүзілік көшпенділер ойындары қарсаңында 2024 жылғы 3-7 қыркүйек аралығында алғаш рет «Ұлы дала жорығы» халықаралық марафон-бəйгесі өтеді,-деп хабарлайды abaidan.kz.
Ауқымды спорттық шараға 10-нан астам елден командалар қатысады деп күтілуде. Иран, Түркия, Венгрия, Қырғызстан, Оңтүстік Африка Республикасы Ресей Федерациясының жəне т.б. елдердің шнабандоздары дүбірлі додада бақ сынайтын болады.
Атап айтсақ, Қырғызстан құрамасы «Ұлы дала жорығына» қатысатын ең үздік аттарды іріктеу мақсатында көпкүндік ат спорты марафонын өткізді.
Қырғызстан Ат спорты федерациясының вице-президенті Манас Сұлтанов «Ұлы дала жорығы» марафон-бəйгесіне шақыруды қабылдау үлкен мəртебе екенін айтты.
«Қазақстанда өтетін көпкүндік ат жарысына дайындық аясында 300 шақырымдық қашықтыққа «Кочмондор журушу» іріктеу марафоны өтті. Барлық командаларға сəттілік тілеймін жəне жеңімпаздардың көп болуын қалаймын. Ең төзімді жəне жылдам сəйгүліктер жеңіске жетіп, тұғырдан көрінетініне сенімдімін», - деді М.Сұлтанов.
Марафон-бəйге 5 мың жылдан астам бұрын адам баласы жылқы малын алғаш рет қолға үйреткен Солтүстік Қазақстан облысындағы Ботай елді мекенінде 3 қыркүйекте бастау алады.
«Ұлы дала жорығына» Кабардин-Балқар Республикасының құрамасы да қатысуға дайындалуда. «АМД Кавказ» ат спорты клубының негізін қалаушы Ахъед Махов қазақстандық ат жарысына қатысуға шақырту алғанын айтты.
«Марафон-бəйгенің бүкіл адамзат үшін киелі мекен саналатын Ботай қонысынан басталуы ерекше маңызды. Біздің команда аңыздар мен тарихи жəдігерлерге толы Ботай жеріне баруға ерекше ынталы. Олай болса, күт бізді, Қазақстан!», - деп атап өтті А.Махов.
Ат жарысы елорда - Астанада 7 қыркүйекте аяқталады. Оның жеңімпаздары 8 қыркүйекте өтетін 5-ші Дүниежүзілік көшпенділер ойындарының ашылу салтанатына қатысады.
«Ұлы дала жорығы» – жылқы баласының ең мықты тұқымы анықталатын далалық лабороториясы.
Естеріңізге сала кетейік, «JORYQ» республикалық федерациясы Қазақстан Республикасы Ұлттық спорт қауымдастығының құрамына кіреді. Сонымен қатар, Қауымдастық құрамына бəйге, көкпар, аударыспақ, асық ату, садақ ату, жамбы ату, теңге ілу, құсбегілік жəне т.б. федерациялар кіреді. Қазақстан Республикасының Ұлттық спорт қауымдастығына белгілі кəсіпкер, меценат,
«Алтын Қыран» қоры қамқоршылық кеңесінің төрағасы» Исламбек Салжанов басшылық етеді.
#Дүниежүзілік көшпенділер ойындары, #Ұлттық ойындар
