Шығыс Қазақстанда туристерді онлайн есепке алу жүйесі сәтті іске асуда
Шығыс Қазақстан – ерекше табиғаты, таулары мен өзендері арқылы саяхатшыларды баурайтын өңір. Жыл сайын мұнда он мыңдаған турист келіп, таулы соқпақтармен серуендеу, атпен және велосипедпен жүру, джип-турларға қатысу сияқты белсенді демалыс түрлерін таңдайды. Алайда дайындықсыз сапарға шыққан туристер жиі қателікке бой алдырып, төтенше жағдайға тап болып жатады. Осыны ескере отырып, ШҚО Төтенше жағдайлар департаменті құтқарушылары мен облыстық Цифрландыру басқармасы туристерді қашықтан тіркеу жүйесін іске қосты,-деп хабарлайды abaidan.kz ақпараттық агенттігі Altainews.kz сілтеме жасап.
Туристер үшін ыңғайлы тіркеу
Қазірдің өзінде бұл жүйе өзінің тиімділігін дәлелдеді: 35 туристік топ (170-тен астам адам) тіркеліп, саяхаттарын сәтті аяқтап, ешқандай оқыс оқиғасыз қайтқан.
Тіркелу өте оңай: турист арнайы QR-кодты сканерлеп, маршрутты, сапардың күнін және байланыс деректерін көрсетіп, онлайн-форманы толтырады. Бұл мәлімет бірден ШҚО ТЖД жедел орталығына түседі. Егер төтенше жағдай туындаса, құтқарушылар дереу әрекет етіп, көмек көрсете алады.
Маршрут аяқталған соң саяхатшы өзін жүйеден шығара алады немесе құтқарушылардың бақылау қоңырауын күтеді.
Қауіпсіздік – басты назарда
Жаңа жүйе қазақ, орыс, ағылшын және қытай тілдерінде қолжетімді. Тіркелмеген туристер төтенше жағдайға тап болғанда, іздестіру-құтқару жұмыстары қиындай түседі және құтқаруға кететін уақыт артады.
Биылғы жазғы маусымда ғана ШҚО құтқарушылары таулы-орманды аймақтарда адасып кеткен адамдарды іздеуге 16 рет шыққан.
