Табиғат – адамзатқа аманат етілген ортақ қазына. Оның әрбір өзені мен орманы, жан-жануары мен табиғи байлығы – бүгінгі ұрпақтың ғана емес, келешек ұрпақтың да еншісі. Сондықтан қоршаған ортаны қорғау экологиялық бастамамен ғана шектелмей, заң мен тәртіпті қамтамасыз етудің маңызды бағытына айналып отыр.
Мемлекет басшысының бастамасымен жүзеге асып жатқан «Таза Қазақстан» жалпыұлттық бастамасы қоғамда экологиялық мәдениетті қалыптастырып, туған жерге деген жауапкершілікті арттыруға жол ашты. Алайда табиғатты таза ұстау бір күндік науқан емес. Бұл – әр азаматтың күнделікті әдетіне, өмір салтына айналуы тиіс құндылық. Ал сол жауапкершіліктің берік негіздерінің бірі – заң талаптарын сақтау.
Осы ретте табиғатты қорғау саласында қызмет атқарып жүрген полиция қызметкерлерінің еңбегі айрықша. Семей қаласында бұл бағыттағы жұмыс құқық қорғау органдарының күнделікті қызметімен тығыз сабақтасып келеді. Солардың бірі – Семей қаласы Полиция басқармасы қоғамдық қауіпсіздік бөлімшесінің табиғатты қорғау полиция тобының инспекторы, полиция аға лейтенанты Рахметолла Фархат Қанатбекұлы.
Фархат Рахметолла – Семей қаласының тумасы. Екі жоғары мамандықты меңгерген. Тарих пәнінің мұғалімі және құқықтану саласының маманы. Полиция қызметіндегі еңбек жолын 2017 жылы бастаған. Қазіргі таңда табиғатты қорғау бағытындағы қызметті атқарып, табиғи ресурстарды заңсыз пайдаланудың алдын алу, экологиялық құқық бұзушылықтарды анықтау және олардың жолын кесу ісіне үлес қосып келеді.
Қызмет жолындағы тәжірибесі оған табиғатты қорғау жұмысының тек бақылау мен жауапкершілікке тартудан тұрмайтынын жақсы түсінуге мүмкіндік берген. Бұл салада ең маңызды міндеттердің бірі – құқық бұзушылықтың алдын алу. Азаматтарға заң талаптарын түсіндіру, табиғи аумақтарды бақылау, заңсыз әрекеттерге дер кезінде тосқауыл қою – табиғатты қорғау полициясы қызметінің негізгі бағыттарының бірі.
Табиғатқа келтірілген залал кейде бір ғана заңсыз әрекеттен басталғанымен, оның зардабы ұзақ жылдарға созылуы мүмкін. Заңсыз аң аулау, табиғи ресурстарды рұқсатсыз пайдалану, қоршаған ортаны ластау секілді әрекеттер табиғи тепе-теңдікке кері әсер етеді. Сондықтан әрбір рейд пен тексерудің артында үлкен жауапкершілік жатыр.
Фархат Рахметолланың қызметіне әріптестері де оң бағалайды.
Қоғамдық қауіпсіздік бөлімшесінің қару айналымын бақылау және табиғатты қорғау полиция тобының инспекторы, полиция майоры Бауыржан Саубенов қызметтесіне берген пікірінде оның жауапкершілігі мен кәсібилігін атап өтті.
«Рахметолла Фархат Қанатбекұлы өз қызметтік міндеттерін жауапкершілікпен атқаратын, тәртіпті, адал және еңбекқор қызметкер. Қызмет барысында заң талаптарын сақтап, тапсырмаларды уақытылы әрі сапалы орындайды. Әріптестерімен қарым-қатынасы жақсы, ұжыммен тіл табыса біледі. Азаматтармен сөйлесу барысында сыпайылық пен әдептілікті сақтайды. Қиын жағдайларда сабырлылық танытып, дұрыс шешім қабылдай алады».
Әріптесінің айтуынша, Фархат Рахметолла кәсіби білімін жетілдіруге үнемі ұмтылатын, қызметтік тәртіпті қатаң сақтайтын және сенім артуға болатын қызметкер. Бұл пікірді Қоғамдық қауіпсіздік бөлімшесінің бастығы, полиция подполковнигі Елдос Оразалин де қуаттайды.
«Рахметолла Фархат Қанатбекұлы қызметтік міндеттерін атқару барысында өзін жауапты, тәртіпті және білікті қызметкер ретінде көрсетті. Қызметтік тапсырмаларды сапалы әрі уақытылы орындайды, белгіленген талаптарды сақтайды. Ұжымда әріптестерімен жақсы қарым-қатынаста, басшылықтың тапсырмаларын дұрыс қабылдап, жауапкершілікпен орындайды. Азаматтармен қарым-қатынаста әдептілік пен сыпайылық танытады»,-дейді ол.
Басшысының бағалауынша, Фархат Рахметолла өз міндетіне адал қарайды, кәсіби білімі мен тәжірибесін қызмет барысында тиімді пайдаланады және сенім артуға болатын білікті полиция қызметкері ретінде қалыптасқан. Әрине, қызметтегі жауапкершілікпен қатар адамның өміріндегі басты құндылықтардың бірі – отбасы. Фархат Рахметолла отбасын құрған, екі бала тәрбиелеп отыр. Демек, табиғатты қорғау оның қызметтік міндеті ғана емес, келешек ұрпақтың қандай ортада өмір сүретініне қатысты азаматтық ұстанымы деуге болады. Бүгінде экологиялық мәдениет ұғымын тек қоқыс тастамау немесе сенбілікке қатысумен шектеуге болмайды. Ол табиғи ресурстарды ұқыпты пайдалану, белгіленбеген жерге қалдық қалдырмау, жануарлар дүниесіне құрметпен қарау, табиғи аумақтардың тыныштығын бұзбау және ең бастысы – заңды сақтау сияқты нақты әрекеттерден көрінеді. Осы тұрғыдан алғанда, «Таза Қазақстан» мен «Заң мен тәртіп» қағидаттарының өзара үндестігі анық. Бірі қоғамды қоршаған ортаны қорғауға үндесе, екіншісі сол жауапкершілікті заң талаптарымен бекемдейді. Екеуінің түпкі мақсаты ортақ – қауіпсіз, таза әрі жауапты қоғам қалыптастыру.
Табиғатты қорғау полициясының жұмысы қырағылықпен қатар табандылықты, ұқыптылықты және кәсіби біліктілікті талап етеді. Әрбір рейд – табиғи байлықты сақтауға бағытталған нақты қадам. Әрбір түсіндіру жұмысы – құқық бұзушылықтың алдын алуға берілген мүмкіндік. Ал әрбір анықталған заңсыз әрекет – табиғатқа келуі мүмкін залалдың жолын кесу.
Семей сынды табиғи әрі тарихи мұрасы мол өңір үшін бұл жұмыстың маңызы айрықша. Туған өлкенің табиғатын сақтау – оның болашағын сақтау. Ал болашақ алдындағы жауапкершілік әр азаматтың өзінен басталады.
Тазалық мәдениеті де, заңға құрмет те бір күнде қалыптаспайды. Ол отбасынан, мектептен, қоғамдық ортадан басталып, күнделікті өмірде орнығады. Құқық қорғау органдарының табиғатты қорғау бағытындағы қызметі осы ортақ жауапкершіліктің заңдық негізін қамтамасыз етеді. Табиғат – ортақ қазына. Тазалық – ортақ міндет. Заң мен тәртіп – ортақ жауапкершілік. Осы үш ұғым бір арнада тоғысқанда ғана «Таза Қазақстан» идеясы нақты нәтижеге айналады. Бүгін табиғатты қорғауға жасалған әрбір қадам – ертеңгі ұрпаққа қалатын таза әрі қауіпсіз ортаның кепілі. Сондықтан қоршаған ортаны қорғау – жай ғана міндет емес, болашақ алдындағы азаматтық парыз. Ал сол жауапкершілікті заң мен тәртіп арқылы бекіту – табиғатты сақтаудың ең сенімді жолдарының бірі.
