Қазақстанның жаңа саяси жүйесі аясында өтетін Құрылтай депутаттарының алғашқы сайлауы шетелдік сарапшылардың назарын аударып отыр. Қырғызстандық саясаттанушы Шерадил Бақтығұловтың пікірінше, бұл сайлау соңғы жылдары жүзеге асырылған ауқымды саяси реформалардың қорытынды кезеңі болады, деп хабарлайды Kazinform агенттігі.
Биылғы 23 тамызға белгіленген Құрылтай депутаттарының сайлауы Қазақстанның заң шығарушы билігінің қызметінде жаңа кезеңнің басталуын білдіреді. Азаматтар алдағы бес жыл бойы заңдар қабылдап, мемлекеттік саясаттың негізгі бағыттарын айқындауға қатысатын жаңа бірпалаталы өкілді органның құрамын қалыптастырады.
Шерадил Бақтығұлов жиырма жылдан астам уақыт бойы Орталық Азия елдеріндегі мемлекеттік басқару тиімділігін арттыру мәселелерімен, сондай-ақ даму саясаты мен халықаралық ынтымақтастық саласындағы үдерістерді зерттеумен айналысып келеді. Оның бағалауынша, соңғы жылдары Қазақстан бірқатар терең саяси реформаларды жүзеге асырды, ал алдағы сайлау сол өзгерістердің түйінді кезеңі болмақ.
— Соңғы жылдары Қазақстан терең саяси реформаларды бастады. Ал осы өзгерістердің түйінді кезеңі 2026 жылғы 23 тамызда өтетін парламенттік сайлау болады. Бұл сайлаудың тарихи маңызы ерекше, өйткені ол мүлде жаңа саяси жүйе аясында өткізілетін алғашқы сайлау, — деді Шерадил Бақтығұлов.
Сарапшының пікірінше, әңгіме тек депутаттар құрамының жаңаруы туралы емес, елді басқару моделінің түбегейлі қайта қаралуы жөнінде болып отыр. Бірпалаталы жүйе жағдайында Құрылтай депутаттары елдегі барлық заңдарды қабылдау үшін шоғырланған жауапкершілікке ие болады.
— Бұл шын мәнінде тарихи маңызы зор оқиға. Өйткені ол тек депутаттар құрамының ауысуын ғана емес, елді басқару моделінің түбегейлі өзгеруін білдіреді. Бұл сайлау мемлекеттік билік құрылымын өзгертеді. Оның үстіне, бірпалаталы жүйеде Құрылтай депутаттары елдің барлық заңдарын қабылдау үшін бірыңғай жауапкершілікке ие болады, — деп атап өтті ол.
Шерадил Бақтығұловтың қорытындылауынша, 2026 жылғы парламенттік сайлаудың нәтижесі Қазақстанның саяси жүйесінің болашағы үшін шешуші мәнге ие болады.
— Сондықтан 2026 жылғы парламенттік сайлауның маңызы аса зор. Саяси жүйедегі түбегейлі өзгерістерден кейін бұл сайлаудың нәтижесі Қазақстандағы билік конфигурациясын және жаңа конституциялық жүйе аясындағы саяси күштердің арақатынасын тікелей айқындайды, — деп түйіндеді сарапшы.
Осылайша, қырғызстандық саясаттанушы алдағы сайлауды кезекті электоралдық науқан ретінде ғана емес, Қазақстандағы саяси трансформацияның аса маңызды кезеңі әрі мемлекеттік басқарудың жаңа жүйесінің одан әрі дамуын айқындайтын шешуші оқиға ретінде бағалайды.
