ШҚО-да алдағы жарты жылға арналған экономикалық басымдықтар анықталды
Шығыс Қазақстан облысының әкімдігінде өткен кеңейтілген отырыста 2025 жылдың алғашқы жартысындағы әлеуметтік-экономикалық даму қорытындылары шығарылып, жыл соңына дейінгі басты бағыттар белгіленді, деп хабарлайды abaidan.kz ақпараттық агенттігі Altainews.kz сілтеме жасап.
Экономика және бюджеттік жоспарлау басқармасының мәліметінше, сыртқы сын-қатерлерге қарамастан, өңірде әлеуметтік-экономикалық көрсеткіштердің басым бөлігінде оң динамика сақталып отыр.
Негізгі капиталға салынған инвестициялар көлемі өткен жылмен салыстырғанда 101,2%-ды құрады. Құрылыс жұмыстары – 102,4%, сауда саласы – 102,8% өсім көрсетті.
Ауыл шаруашылығы саласында да өсім бар. Ауыл, орман және балық шаруашылығының жалпы өнімі 4,6%-ға артты. Тікелей ауыл шаруашылығы – 4,8% өсіп, жалпы өнім көлемі 115,8 млрд теңгеге жетті (өсім – 122,7%).
Осы кезеңде 145,7 мың шаршы метр тұрғын үй пайдалануға беріліп, бұл көрсеткіш өткен жылмен салыстырғанда 2,9%-ға жоғары болды.
Шағын және орта кәсіпкерлік субъектілерінің саны 62,8 мыңға жетіп, 100,9%-ды құрады.
– Біздің басты міндетіміз – экономиканы әртараптандыру және инвестиция тарту. Басым бағыттар – шағын және орта бизнес, туризм, өнеркәсіптік және ауылшаруашылық өнімдерін өңдеу, цифрландыру және инфрақұрылымды дамыту, – деді ШҚО әкімі Нұрымбет Сақтағанов.
Алайда аймақ басшысы өнеркәсіп пен жеке инвестициялар тарту бойынша көрсеткіштердің жоспардан төмен екенін айтты. Соған қарамастан, әкім атап өткен бағыттар халықты жұмыспен қамтуға, табысты арттыруға және бюджетке түсетін салық көлемін көбейтуге үлкен мүмкіндік береді.
Президенттің 2029 жылға дейін экономиканы екі есеге арттыру жөніндегі тапсырмасын жүйелі жүзеге асыру үшін облыста жобалық офис құрылып, әр аудан мен қала бойынша «өсу нүктелеріне» арналған бес жылдық жоспарлар бекітілді. Сонымен қатар ауылдық округтерге арналған жол карталары жасалды. Әр аудан әкімімен 2025 жылға арналған KPI көрсеткіштерін орындау жөніндегі жеке меморандумдарға қол қойылды. Бұл құжаттарда нақты іс-шаралар мен инвестициялық жобалар – инженерлік инфрақұрылымды жаңғыртудан бастап, ауыл шаруашылығы тауар өндірушілері мен өңдеуші кәсіпорындар арасындағы кооперацияны қолдау қамтылған.
– Басты мақсатымыз – шағын және орта бизнестің өңірлік жалпы өнімдегі үлесін 24%-ға жеткізу және өнеркәсіптік өндіріс көлемін арттыру, – деді Нұрымбет Сақтағанов.
Осылайша, Шығыс Қазақстан өңірдің болашақтағы өсіміне негіз болатын құрылымдық негізін қалыптастыруды жалғастырып келеді. Бұл – кәсіпкерлік, технологиялық даму және тиімді басқару жүйесіне сүйенетін бағыт.
