"Қазақстан барысы-2024" турнирінің жеңімпазы құрмет көрсетілді
"Қазақстан барысы-2024" турнирінің жеңімпазы cемейлік балуан Ерасыл Қажыбаевқа демеушілер көлік мінгізді. Бұл туралы ақын Мерей Қарт Instagram-дағы парақшасында жазды, деп хабарлайды abaidan.kz. Ерасыл Қажыбаевқа белгілі меценат Дулат Тастекей мен кәсіпкер, облыстық мәслихат депутаты Қайырлы Қасенов су жаңа көлік тарту еткен. "Бұл сый-құрмет – батырлық пен табандылықтың лайықты бағасы. Өзінің қайсарлығымен елдің сүйіспеншілігіне бөленген Ерасыл Қажыбай ұлттық спорттың дамуына үлес қосып, жастарға үлгі болып жүр", - деп жазды Мерей Қарт. Еске салайық, Ерасыл Қажыбаев Астанада өткен қазақ күресінен XIII республикалық "Қазақстан барысы" турнирінің жеңімпазы атанған еді. Ол финалда шымкенттік балуан Ерсұлтан Мұзаппаровтан басым түсті. Осы жеңісінен кейін Қажыбаевқа Абай облысының әкімі Нұрлан Ұранхаев үш бөлмелі пәтер мен демеушілер атынан көліктің сертификатын табыстаған болатын.
