Бүгін, 2026 жылғы 9 қыркүйекте Alikhan Bokeikhan University және М.О. Әуезов атындағы педагогикалық колледж базасында цифрлық сауаттылықты арттыруға және кибермәдениетті қалыптастыруға бағытталған ауқымды форум-семинар өтті.
Іс-шара республикалық науқан аясында Ақпараттық қауіпсіздік комитетінің және Абай облысының цифрлық технологиялар басқармасының қолдауымен ұйымдастырылды.
Форум сандар мен деректерде
Іс-шараға 100-ден астам қатысушы жиналды. Олардың қатарында жергілікті атқарушы органдардың өкілдері, оқу орындарының басшылығы, ақпараттық қауіпсіздік саласының мамандары, сондай-ақ өңірдегі технологиялық кластерлердің өкілдері болды.
Пленарлық сессия барысында қатысушылар мына мәселелерді жан-жақты талқылады:
фишингтен қорғанудың практикалық шаралары және дербес деректердің таралып кетуінің алдын алу;
заманауи киберқауіптерге ден қою алгоритмдері;
ақпараттық қауіпсіздік саласындағы заңнамалық реттеудің өзекті аспектілері.
Іс-шараның негізгі спикерлері
Бауыржан Наурызбаев, Абай облысының цифрлық технологиялар басқармасы басшысының орынбасары — өңірдегі цифрлық трансформацияның барысы және киберқауіпсіздікті қамтамасыз ету мәселелері туралы айтып берді.
Бейімбет Дәрібаев, Шәкәрім университеті КЕАҚ Басқарма мүшесі – цифрландыру жөніндегі проректор — университет студенттерінің серпінді жобалары туралы баяндады.
Айдархан Қайратов, Ақпараттық қауіпсіздік комитетінің бас сарапшысы — «Киберай және кибермәдениет» тақырыбында баяндама жасап, халық арасында киберқауіптердің алдын алу мәселелерін түсіндірді.
Асет Ордабаев, Kaspersky компаниясының Орталық Азия және Моңғолия бойынша мемлекеттік органдармен жұмыс жөніндегі басшысы — дербес деректерді қорғау және практикалық кибергигиена негіздері туралы сараптамалық пікір білдірді.
Асет Мазов, Abai IT-Valley өңірлік технологиялық кластерінің директоры және Тұрсынжан Әнет Маратұлы, халықаралық IT-стартаптар технопаркі Astana Hub-тың облыстық филиалы Semey Hub директоры — өңірдің қауіпсіз цифрлық ортасын қалыптастыруда IT-қоғамдастық пен стартап-экожүйені тартудың маңыздылығын атап өтті.
Форумды өткізу — қазақстандықтардың цифрлық сауаттылығын арттыру, сондай-ақ мемлекеттік сектор, академиялық қоғамдастық пен IT-бизнес арасындағы әріптестікті нығайту бағытындағы жүйелі жұмыстың маңызды қадамы.
