Семей қаласында қазақ ән өнерінің көрнекті өкілі, сырлы сазгер Тұрсынғазы Рахимовтың 75 жылдық мерейтойына арналған республикалық ән байқауының ашылу салтанаты өтті. Ұлттық өнерді ұлықтауға бағытталған мәдени шараға еліміздің әр өңірінен келген өнерпаздар қатысып, сазгердің бай мұрасын кеңінен насихаттауға мүмкіндік алды.
Салтанатты рәсімде қала әкімі Әділет Қожанбаев құттықтау сөз сөйлеп, қазақ музыка өнерінің дамуына үлес қосқан тұлғалардың шығармашылығын дәріптеудің маңыздылығына тоқталды. Ол мұндай байқаулар ұлттық мәдениеттің сабақтастығын сақтауға, жас таланттардың шығармашылық әлеуетін дамытуға және халықтың рухани мұрасын келер ұрпаққа жеткізуге ықпал ететінін атап өтті.
Шара барысында Тұрсынғазы Рахимовтың жұбайына ерекше құрмет көрсетілді. Қазақы дәстүрге сай камзол кигізу рәсімі арқылы сазгердің отбасына деген ізет пен құрмет білдіріліп, ұлттық салт-дәстүрдің тағылымды үлгісі көрініс тапты.
Мерейтойлық байқаудың ашылуы аясында көрермендерге Қуат Қиықбайдың сазгердің өмірі мен шығармашылығына арналған «Ән бесік» драма-концерті ұсынылды. Қойылымның режиссері – Қазақстанның еңбек сіңірген қайраткері Жұлдызбек Жұманбай. Өнер туындысы арқылы көрермен қауым сазгердің шығармашылық жолына үңіліп, оның қазақ ән өнеріндегі өзіндік қолтаңбасын тереңірек тануға мүмкіндік алды.
Республикалық ән байқауына еліміздің әр өңірінен келген 21 өнерпаз қатысуда. Қатысушылар Тұрсынғазы Рахимовтың әндерін орындау арқылы сазгер мұрасының өміршеңдігін танытып, ұлттық музыкалық дәстүрдің жалғасуына үлес қосады. Байқау өнерпаздардың орындаушылық шеберлігін шыңдап қана қоймай, қазақ ән өнеріне деген құрметті арттыруды да көздейді. Тұрсынғазы Рахимовтың 75 жылдығына арналған бұл мәдени шара – сазгер шығармашылығын ұлықтап, ұлттық өнердің құндылығын дәріптейтін маңызды бастамалардың бірі. Семей төрінде басталған республикалық байқау қазақ әнінің асыл мұрасын жаңғыртып, өнерсүйер қауымды ортақ рухани құндылық төңірегіне біріктірді.
