Мәжіліс депутаты Абай облысындағы аграрлық білім беруді дамыту мәселелерімен танысты.
Мәжіліс депутаты Жигули Дайрабаев Шәкәрім атындағы университеттің Ветеринария және ауыл шаруашылығы зерттеулері мектебінің оқытушылары мен студенттерімен, сондай-ақ Абай облысындағы агроколледждердің басшыларымен кездесу өткізді,-деп хабарлайды abaidan.kz ақпараттық агенттігі Ауыл партиясының баспасөз қызметіне сілтеме жасап.
Кездесуде аграрлық білім беру мен ғылымды дамытудың өзекті мәселелері талқыланды. Университет өкілдері ірі шаруа қожалықтарымен тығыз өзара іс-қимыл жасау қажеттігін атап өтті, бұл студенттердің өндірістік тәжірибеден өтуіне қолайлы жағдай жасауға мүмкіндік береді.
Сонымен қатар ауыл шаруашылығы мамандықтары бойынша білім алып жатқан студенттердің шәкіртақы мөлшерін арттыру мәселесі көтерілді. Агроколледж басшылары оқу-өндірістік үдерісті ұйымдастыру үшін білім беру ұйымдарына жер учаскелерін бөліп беру және оларды ауыл шаруашылығы техникасымен қамтамасыз ету жөнінде ұсыныстарын білдірді.
Жигули Дайрабаев аталған бастамалардың жүзеге асырылуы аграрлық сала үшін білікті кадрлар даярлауға және ауылдық аумақтардың тұрақты дамуына ықпал ететінін атап өтті. Оның айтуынша, барлық ұсыныстар назарға алынып, алдағы депутаттық қызмет барысында қарастырылатын болады.
#Абай облысы, #мәжіліс, #Парламент, #депутат
