Түркітілдес журналистер қорының ұйымдастыруымен VI халықаралық журналистер форумы аясында журналистер арасында тоғызқұмалақтан сайыс өтті.
Сайысқа еліміздің әр өңірінен келген журналистер қатысты. Қатысушылар тоғызқұмалақ ережелерін сақтай отырып, әр турда бір-бірімен мықтылығын сынады.
Шараның басты мақсаты – журналистердің интеллектуалды дамуына мүмкіндік беру, ұлттық ойындар арқылы мәдени байланыстарды нығайту және кәсіби ортада достық атмосфера қалыптастыру болды.
Форум қатысушылары сайыс барысында тек жеңіске жетуді ғана емес, ойынның тарихы мен ұлттық дәстүрлерді дәріптеуді де басты мақсат еткендерін атап өтті.
Жарыс қорытындысы бойынша қыздар арасында бірінші орынды «Хабар» телеарнасы Алматы филиалының продюсері Гүлжан Қызайбай жеңіп алды. Екінші орынға Семей қаласының блогері Ақнұр Қайратқызы ие болса, үздік үштікті Салтанат Қажыкен түйіндеді. Төртінші орын Алматы қаласының студенті Томирис Маратқызына бұйырды.
Ерлер арасында үздік нәтижені Sportpress.kz сайтының өкілі Нұрлан Құмар көрсетті. Одан кейінгі орындарды Батыс Қазақстан облысындағы «Ақжайық» телеарнасының тілшісі Тұрар Ғабдырашитұлы мен Алматыдан келген ТТЖҚ медиатренері Ерсұлтан Хожалепес иеленді. Төртінші орынға «Сыр медиа» ұжымының өкілі, қызылордалық Мақсұт Ибрашев лайық деп танылды.
Барлық жүлдегерге арнайы дипломдар мен бағалы сыйлықтар табысталып, ұйымдастырушылардың алғыс хаттары берілді.
Қор президенті Нәзия Жоямергеннің айтуынша биылдан басталған бұл сайыс дәстүрлі түрде жыл сайын өткізіліп тұратын болады.
