Қазақстанда орташа табыс деңгейі мен зейнетақы жинақтарының қауіпсіздігі: Президент сұхбаты мен сарапшылар пікірі
Қазақстан Президенті жақында берген сұхбатында елдің экономикалық жағдайына қатысты маңызды мәлімдеме жасады. Оның айтуынша, Қазақстан «орташа табыстар қақпанына» қайта оралған. Бұл халықтың табысы болса да, оны көбінесе инфляция мен күнделікті қажеттіліктерге жұмсап, нақты қаржылық жинаққа айналдырмайтынын көрсетеді. Бұл туралы дәрігер-стоматолог Съезбек Ахметов айтты,-деп хабарлайды abaidan.kz ақпараттық агенттігі. Мысалы, азаматтар ипотека төлеу, балаларын оқыту немесе ата-анаға қолдау көрсету сияқты шығыстарға қаржыны жұмсайды. Сол себепті жоспарланбаған шығыстар тұрмыстық тұрақтылыққа қатер төндіруі мүмкін.
Сұхбат барысында Президент зейнетақы жинақтарын пайдалану ережелерінің өзгеру себептерін де түсіндірді. Атап айтқанда, кейбір алаяқтар стоматология қызметін көрсету арқылы зейнетақы қорынан 200 миллиард теңгеден астам қаражатты жымқырған. Осы жағдайға байланысты стоматологиялық қызмет түріне жинақты пайдалану тыйым салынды. Қазіргі таңда пластикалық ота сияқты өзге медициналық қызмет түрлерінде де осындай алаяқтық әрекеттер болуы мүмкін екені ескеріліп отыр.
Дәрігер-стоматолог Съезбек Ахметов бұл жағдайдың халықтың зейнетақы жинағын қорғаудың маңыздылығын көрсететінін айтты. Оның пікірінше, мемлекет тек шынайы медициналық қажеттіліктер үшін ғана зейнетақы қаражатын пайдалануды қамтамасыз етіп, алаяқтық әрекеттердің алдын алуға күш салып отыр. Бұл азаматтардың қаржылық қауіпсіздігі мен сенімін нығайтуға бағытталған маңызды қадам.
Экономикалық тұрғыдан алғанда, азаматтардың табысын тиімді басқару және жинақтарды қорғау – елдің жалпы қаржылық тұрақтылығы үшін шешуші фактор. Қоғам мен мемлекет арасындағы сенімділікті арттыру арқылы Қазақстан азаматтарының тұрмыстық қауіпсіздігі мен болашағы қамтамасыз етіледі.
