Абай облысында полицей талмасы ұстап қалған баланы құтқарды
Тәртіп сақшысы баланы құтқарып қалды,-деп хабарлайды abaidan.kz агенттігі Абай облысы ПД баспасөз қызметіне сілтеме жасап. Бала көшенің ортасында талмасы ұстап, қиналып жатады. Өтіп бара жатқан адамдардың ешқайсысы көмектесе алмағандықтан, жедел жәрдем шақырады. Дәл осы кезде шақыртуға кетіп бара жатқан тәртіп сақшысы Дастан Толахметов, есінен танып қалған баланы байқап, қасына жүгіріп жетеді. Бала арқасымен жатқандықтан тілі тыныс алу жолдарын жауып, дем алуы қиындаған еді. Ең алдымен полицей баланы аударып, қалыпты тыныс алуы үшін аузын ашады.
— Жедел жәрдем келіп жеткенше баланы қолымнан босатпай, басын ұстап отырдым. Медицина қызметкерлері келген соң баланы оларға тапсырып, арқамнан ауыр жүк түскендей болды, — дейді Дастан.
Полиция қызметкері эпилепсиямен ауыратын 15 жастағы жасөспірімге уақтылы және шешуші көмек көрсете білді.
Қазір баланың өмірі мен денсаулығына ешқандай қауіп төніп тұрған жоқ.
#Семей, #Абай облысы, #Полиция
