Жаңа спорт нысандары – салауатты ұрпақ кепілі
Абай облысында бұқаралық және кәсіби спортты дамыту бағытында ауқымды жұмыстар жүргізілуде,- деп баяндады өңірлік коммуникациялар қызметінде өткен баспасөз мәслихатында Абай облысы әкімінің орынбасары Мейірлан Раханов. Оның айтуынша, қазіргі таңда өңірдегі 26 спорт мекемесінде 14 783 спортшы тұрақты түрде жаттығады. Бұл көрсеткіш облыс тұрғындарының спортқа деген қызығушылығының артып келе жатқанын дәлелдейді.
2025 жылы Абай облысының 451 спортшысы Қазақстан Республикасының құрама командасы қатарына енді. Оның ішінде ересектер — 156, жастар — 112, юниорлар мен жасөспірімдер — 183 спортшы. Бұл — өңір спортшыларының жоғары деңгейдегі дайындық пен нәтижелі еңбегінің айғағы,-деді облыс әкімінің орынбасары.
Жыл басынан бері спортшылар еліміздің намысын халықаралық және республикалық деңгейдегі ірі жарыстарда абыроймен қорғап жүр. 2025 жылдың 10 айының қорытындысы бойынша спортшыларымыз:
- Республикалық жарыстарда – 1662 медаль (476 алтын, 484 күміс, 702 қола);
- Халықаралық сайыстарда – 286 медаль (93 алтын, 81 күміс, 112 қола) иеленді.
Бұл көрсеткіштер облыстың спорт әлеуетінің жоғары екенін және жас буынның үлкен жетістіктерге ұмтылысын айқын көрсетеді.
Командалық спорттағы табыстар: «Елімай» футбол клубы биылғы ел чемпионатында төртінші орынды иеленіп, УЕФА Конференция лигасының іріктеу кезеңіне жолдама алды. Ал «Семей» футзал командасы 2024 жылы ел Кубогының жеңімпазы атанып, биылғы маусымда 9 ойыннан кейін чемпионат кестесінде 1-орында тұр. Сонымен қатар, команда Чемпиондар лигасының 1/8 финалына жолдама алды.
Спорт инфрақұрылымын дамыту бағытында да үлкен жұмыстар атқарылуда. 2023 жылдан бері облыс аумағында 10 жаңа спорт нысанының құрылысы аяқталып, пайдалануға берілді. Қазіргі уақытта 20 спорт нысанының құрылысы жүргізілуде.
Атап айтқанда:
- Курчатов, Бесқарағай, Бородулиха, Қопа, Көкбай, Жанай, Семей және басқа елді мекендерде** спорт кешендері мен жүзу бассейндері** салынып жатыр.
- Бірқатар нысандар жеке демеушілер мен әлеуметтік қорлардың қолдауымен жүзеге асуда. Мысалы, Урджар ауданының Жанай ауылындағы спорт залы Серікбол Берікболұлының демеушілігімен, ал Семей қаласындағы жабық футбол манежі «Freedom Holding» компаниясының қолдауымен бой көтеруде.
- Бұл жобалардың көпшілігі 2025–2026 жылдары толық аяқталып, пайдалануға берілмек.
Сонымен қатар, меморандум аясында Семей, Ақсуат және Мақаншы аудандарында бірқатар спорт кешендері мен модульдік залдардың құрылысы жүргізіліп жатыр.
-Семей қаласында 25 мың орындық заманауи футбол стадионының құрылысы басталды. Бұл нысан тек аймақтық емес, республикалық маңызы бар спорт орталығына айналмақ. Заманауи талаптарға сай салынатын стадион болашақта халықаралық деңгейдегі матчтарды қабылдауға мүмкіндік береді,-деді Мейірлан Раханов.
Қорытындылай келе, Абай облысында спорт саласы жүйелі түрде дамып келеді. Жаңа нысандардың салынуы, спортшылардың халықаралық жетістіктері мен командалық табыстар өңірдің спорттық әлеуетін жаңа деңгейге көтеруде. Облыс басшылығының және демеушілердің қолдауы нәтижесінде Абай жері алдағы уақытта да еліміздің спорттық орталықтарының біріне айналары сөзсіз.
