Абай облысының әкімі: Кезекте тұрғандарды баспанамен қамтамасыз ету – өзекті мәселе
Облыс әкімі Берік Уәлидің төрағалығымен өткен кеңейтілген аппараттық кеңесте тұрғын үй құрылысы мен құрылыс-монтаждау жұмыстарының барысы талқыланды.Қазіргі таңда аймақта 20 мыңнан астам адам баспана кезегінде тұр. Осы мәселені шешу үшін тиісті жұмыстар жүргізілуде.
Биыл өңірде барлық қаржыландыру көздері есебінен 370 мың шаршы метр тұрғын үйді пайдалануға беру жоспарланған. Оның 230 мың шаршы метрі — көпқабатты тұрғын үйлер, 140 мың шаршы метрі — жеке тұрғын үй құрылысы.
Қазіргі таңда облыста жалпы ауданы 79,7 мың шаршы метр болатын 1044 пәтерлік 14 кредиттік үйдің құрылысы жүргізілуде. Бұдан бөлек 61 мың шаршы метрден асатын 7 көпқабатты коммерциялық тұрғын үй салынуда. Сонымен қатар жыл соңына дейін 40 мың шаршы метрге жуық жеке тұрғын үйді іске қосу көзделген.
Облыста 2026 жылы 14 кредиттік үйді салу үшін жобалық-сметалық құжаттама әзірленген. Бұған қосымша тағы 15 үйге жоба әзірленуде. Бұл жобалар толық іске асса, 2026 жылы тек кредиттік тұрғын үйлердің есебінен 159,6 мың шаршы метр баспана берілмек.
Аймақ басшысы жиында кезекте тұрғандарды баспанамен қамтамасыз ету өзекті мәселе екенін атап өтті. Орынбасары Д.Гариков, құрылыс, сәулет, қала құрылысы және жер қатынастары, экономика және бюджеттік жоспарлау басқармалары басшыларына бұл бағыттағы жұмысты жандандырып, көпқабатты тұрғын үй құрылысын жүргізу бойынша 3 жылдық жоспар әзірлеуді тапсырды.
Күнтәртібіндегі үшінші мәселе әлеуметтік-экономикалық даму көрсеткіштері бойынша хаттамалық тапсырманың орындалу барысы туралы Экономика және бюджеттік жоспарлау басқармасы басшысы Роза Құдайбергенқызы баяндады.
Тау-кен өнеркәсібі, өңдеу өнеркәсібі, инвестиция тарту, көлік қызметтері, құрылыс және тұрғын үйді пайдалануға беруде көрсеткіштердің төмендегені атап өтілді. Абай, Ақсуат, Бесқарағай, Бородулиха, Жаңасемей, Мақаншы, Үржар аудандарында ішкі сауда бойынша берілген тапсырмалар лайықты деңгейде орындалмаған. Аталған аудан әкімдері жиында бейне режим арқылы аймақ басшысына көрсеткіштерді мерзімінде орындайтынын баяндады.
Облыс әкімі отырыста берілген тапсырмалар хаттамаға енгізілетінін айтып, салаға жауапты орынбасары, тиісті басқарма басшылары, қалалар мен аудандардың әкімдеріне барлық көрсеткіштер бойынша бекітілген жоспарды орындау үшін тиісті шаралар қабылдауды тапсырды. Әлеуметтік-экономикалық дамудың негізгі көрсеткіштерінің орындалуын қамтамасыз ету қажеттігін атап өтті.
#Абай облысы, #Абай облысының әкімі, #баспана
